Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Экспо Монгол” Компанийн Ерөнхий захирал Т.Баттулгийг хүлээн авч уулзан, удахгүй зохион байгуулагдах AGRO EXPO 2023 үзэсгэлэн худалдааны талаар санал солилцлоо.
Agro Expo 2023 олон улсын хөдөө аж ахуй, газар тариалан, хүнсний салбарын үзэсгэлэн 2023 оны 09 дүгээр сарын 22-24-ний өдрүүдэд Үндэсний төв цэнгэлдэх хүрээлэнд зохион байгуулагдах гэж байна. Үзэсгэлэн нийт 3 өдрийн турш үргэлжлэх бөгөөд салбарт зориулагдсан семинар, хэлэлцүүлэг, техникийн танилцуулга хийгдэнэ.
Үзэсгэлэнг салбар яам, төрийн байгууллагууд, элчин сайдын яамд дэмжин оролцож байгаа төдийгүй олон улсын байгууллагууд, аймаг сумдын холбогдох төлөөллүүд, салбарын бизнес эрхлэгчид, мал аж ахуй, ферм, газар тариалангийн чиглэлээр үйл ажиллагаа явуулдаг компаниуд, өрхийн бизнес эрхлэгчид, тоног төхөөрөмж импортлогчид оролцох бүрэн боломжтой. Үүнээс гадна судлаач, эрдэмтэн, профессор, шинжээч, хөдөө аж ахуйн мэргэжилтнүүд салбарт бий болж буй өсөлт дэвшил, хөгжлийн талаар мэдээ мэдээллээр хангах ба зорилтод бүлэгт зориулж олон улсын бизнес эрхлэгчид туршлагаасаа хуваалцах томоохон арга хэмжээ болох юм.
Агро Экспо 2023 үзэсгэлэн нь салбар дундын харилцаа холбоог сайжруулах, хамтын ажиллагааг өргөжүүлэх, хөдөө аж ахуйн өнөөгийн хөгжил дэвшлийг нийтэд харуулах, шинэ боломжийг олгох эрхэм зорилготой юм. Үүгээр зогсохгүй үзэсгэлэнгээр дамжуулан нэгэн дээвэр дор үйлдвэрлэгчийг ханган нийлүүлэгчтэй, цаашлаад худалдан авагчтай холбох гүүр болох зорилт тавин ажиллаж байна.
Энэхүү үзэсгэлэнд 10 орны 80 орчим компани оролцох бөгөөд АНУ, Япон БНХАУ, ОХУ, Малайз, Польш, Солонго, Украйн, Беларус зэрэг орнуудаас хөдөө аж ахуй, газар тариалан, хүнсний чиглэлийн компаниуд оролцохоороо онцлог.
