Монгол-Хятадын дөрөв дэх экспо ӨМӨЗО-ны Хөх хотод хоёр дахь өдрөө үргэлжилж байна. 2023 оны 09 сарын 06-10-ны өдрүүдэд зохион байгуулагдах тус арга хэмжээгээр Монгол-Хятадын ОУ-ын Стандартчиллын хоёр дахь удаагийн форум болж байна.
“Стандарт-ногоон хөгжлийг дэмжиж, худалдааг хөнгөвчлөх нь” сэдвийн дор зохион байгуулагдаж буй тус арга хэмжээнд МУ-ын Ерөнхийлөгчийн Тамгын газрын Хүнсний төсөл, хөтөлбөрийн алба, Стандарт, хэмжил зүйн газрын төлөөллүүд оролцож байна.
Хятад, Монголын төрийн болон хувийн хэвшлийн байгууллагуудын 200 гаруй төлөөлөгчид уг форумд оролцож, стандартчиллын хөгжил дэвшил, ач холбогдол, цаашдын чиг хандлага, шийдлийн талаар хэлэлцэж байна. Форумыг нээж ӨМӨЗО-ны Ардын Засгийн газрын дэд дарга Чи Бат, Стандарт, хэмжил зүйн газрын даргын албан үүргийг түр орлон гүйцэтгэгч Б.Ууганбаяр, БНХАУ-ын Үндэсний зах зээлийн хяналт удирдлагын газрын дэд дарга Тянь Шы Хун нар үг хэллээ.
СХЗГ-ын даргын албан үүргийг түр орлон гүйцэтгэгч Б.Ууганбаяр: “БНХАУ болон Монгол Улсын хоорондын урт удаан хугацааны найрсаг харилцааг цохон тэмдэглэж, энэ удаагийн стандартчиллын форум ногоон хөгжлийн асуудалд төвлөрч буй нь маш цаг үеэ олсон хэлэлцүүлэг болох нөхцлийг бүрдүүлж байна” хэмээн онцоллоо.
Уг экспо нь оролцогч аж ахуйн нэгжийн тоог 30 хувиар өсгөж, нийт 35 орны бараа бүтээгдэхүүнийг дэлгэн танилцуулж цар хүрээгээ өргөжүүлсэн онцлогтой болж байгаа юм. Үзэсгэлэнд Манай Улсын 500 аж ахуй нэгж оролцож байгаагийн 95 хувь нь жижиг, дунд үйлдвэрлэл эрхлэгч байна. Салбар чиглэлийн хувьд 95 хувь нь хүнс, мал аж ахуйн салбарын баялаг бүтээгчид байгаа юм. Мөн Монгол, Хятад хоёр улсын худалдаа, эдийн засгийн эргэлтийг нэмэгдүүлэхэд чухал нөлөө үзүүлж буй тус арга хэмжээний хүрээнд хөрөнгө оруулалтыг татах хурал, форумууд зохион байгуулагдаж байна.
