“Хүнсний хангамж, аюулгүй байдал” үндэсний хөдөлгөөний хүрээнд Сэлэнгэ аймгийн Мандал сумын нутагт экспортын төрөлжилтийн суурийг тавьж буй “Монгол бяслаг, Шигүдэри” урлах үйлдвэр /2020.09.08/ ашиглалтад орлоо.

Монгол Улсын Ерөнхийлөгчх Ухнаагийн Хүрэлсүх үйлдвэрийг нээж үг хэллээ.

МОНГОЛ УЛСЫН ЕРӨНХИЙЛӨГЧ УХНААГИЙН ХҮРЭЛСҮХИЙН “МОНГОЛ БЯСЛАГ” ҮЙЛДВЭРИЙГ НЭЭЖ ХЭЛСЭН ҮГ:

Эрхэм хүндэт хүнс үйлдвэрлэгчид, баялаг бүтээгчид ээ,

Эрхэм хүндэт зочид оо,

Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөнийг дэмжиж, эх орноо эрүүл хүнсээр хангах, хүнс экспортлогч орон болох их үйлсэд хүч хөдөлмөр, хичээл зүтгэлээ дайчлан ажиллаж буй эрхэм хүндэт Та бүхэндээ энэ өдрийн мэндийг дэвшүүлье!

“Хүнсний хувьсгал” үндэсний хөдөлгөөнийг хэрэгжүүлэхээр Монгол Улсын Их Хурлаас 36 дугаар тогтоолыг баталж, хүнс, хөдөө аж ахуйн салбарт ирэх таван жилийн хугацаанд 1.7 их наяд төгрөгийн хөрөнгө оруулалт хийхээр шийдвэрлэж, Засгийн газраас 223 орчим тэрбум төгрөгийг энэ онд төсөвлөсөн нь хүнсний үйлдвэрлэлд сүүлийн 30 гаруй жилд хийгдээгүй бодит дэмжлэг юм.

Монголчууд эрт үеэс өнөөг хүртэл мал аж ахуйг олон зуун жил үе дамжуулан эрхэлж ирсэн бөгөөд мал аж ахуйн гаралтай түүхий эд, бүтээгдэхүүнийгүйлдвэрлэж, ашиг шимийг нь хүртэж ирсэн арвин баялаг арга уламжлалтай ард түмэн.

Ялангуяа, сүү сүүн бүтээгдэхүүний үйлдвэрлэл үндэсний онцлогтой хөгжиж, сүү, өрөм, тараг, бяслаг, ээдэм тэргүүтэй цагаан идээ манай иргэдийн өдөр тутмын хэрэгцээ болсон байдаг.

Уламжлалт сүү боловсруулах арга барилыг сүүлийн үеийн дэвшилтэт технологитой хослуулан хөгжүүлж, дэлхийн стандартад нийцсэн сүү, сүүн бүтээгдэхүүнийг үйлдвэрлэхийг цаг үе биднээс шаардаж байна.

​Тэгвэл Та бүхэн өнөөдөр монгол үндэстний өвөрмөц өв соёл, уламжлалыг өрнийн дэвшилтэттехнологитой уялдуулан орчин үеийн хэрэглээгхангасан 5-6 төрлийн органик бүтээгдэхүүн үйлдвэрлэх “Монгол бяслаг” үйлдвэрийг нээж, ашиглалтад оруулж байгаад чин сэтгэлийн баяр хүргэе.

​Энэ үйлдвэр Монгол Улсын хэмжээнд жил бүр гаднаас импортлон авч байгаа 3000 тонн бяслагийн10 орчим хувийг эх орондоо үйлдвэрлэхээс гаднаүйлдвэрлэлийн хоёрдогч түүхий эдийг боловсруулан, дээд зэрэглэлийн сүүн сархад, уураг үйлдвэрлэх эрчим хүчний хэмнэлттэй техник, технологийн цогц шийдэл бүхий үйлдвэрийг бүтээн байгуулсан нь нэн сайшаалтай.

​Энэхүү цогцолбор үйлдвэр ажиллаж эхэлснээр,малын сүүг иж бүрэн ашиглаж, нэмүү өртөг шингэсэн бүтээгдэхүүн үйлдвэрлэх зорилтыг хангахад үнэтэй хувь нэмэр оруулж, нүүдлийн уламжлалт арга ухааныг тээж ирсэн малчдад мал сүргээ өсгөн үржүүлж, малын ашиг шим, чанарт анхаарах, сайн чанарын сүү бэлтгэн нийлүүлж,үйлдвэрлэлийг дотоодоосоо түүхий эдээр хангах, тогтмол орлогоо өсгөх, хөдөө орон нутагт ажлын байрыг нэмэгдүүлэх, импортыг орлох эрүүл органик хүнсийг эх орондоо үйлдвэрлэж, уламжлалт сүүнбүтээгдэхүүнийг дэлхийн зах зээлд гаргах зэрэг олон талын ач холбогдолтой болохыг тэмдэглэжбайна.

​“Монгол бяслаг” үйлдвэрийг байгуулахсанхүүжилтийн тодорхой хувийг “Хүнсний хангамж, аюулгүй байдал” үндэсний хөдөлгөөний хүрээнд хэрэгжүүлж буй хөрөнгө оруулалтын зээлээр шийдвэрлэсэн нь баялаг бүтээгчдэд бодит дэмжлэг, хэрэгцээ шаардлагыг нь хангасан ажил болж, хүнс үйлдвэрлэгчдийн урмыг сэргээж байна.

​Энэхүү цогцолбор үйлдвэрийг бүтээн байгуулахад гар бие оролцсон нийт ажилтан, албан хаагч Та бүхэнд эх орноо эрүүл хүнсээр хангах, улмаар хүнс экспортлогч орон болох их зорилт, үйл хэргийг ажил хэрэг болгохын төлөө хичээн зүтгэжбайгаад гүн талархал илэрхийлж, ажил хөдөлмөрийн өндөр амжилт хүсье.

Та бүхний үйлс бүхэн сүүн цагаан цацал шиг дэлгэрч байх болтугай.

Мөнх тэнгэрийн хүчин дор Монгол Улс мандан бадрах болтугай!”

МОНГОЛ УЛСЫН ​​​​ЕРӨНХИЙЛӨГЧ УХНААГИЙН ХҮРЭЛСҮХ