“Хүнсний хангамж, аюулгүй байдал” үндэсний хөдөлгөөнийг шинжлэх ухаанд тулгуурлан, амьдралд бүтээлчээр үр дүнтэй хэрэгжүүлэх зорилгоор “Хүнс, хөдөө аж ахуйн салбарын Эрдэмтдийн Зөвлөл”-ийг байгуулан ажиллах шийдвэр гарсан. Нийт 19 эрдэмтэн, судлаачдаас бүрдсэн тус зөвлөл өнөөдөр /2023.09.11/ Анхдугаар хурлаа хийлээ.
Өөрөөр хэлбэл төрийн болон төрийн бус байгууллага, аж ахуйн нэгж, олон улсын байгууллагуудын дэмжлэгтэйгээр эрчтэй өрнөж буй энэхүү хөдөлгөөнийг зөв чиглүүлэх луужин хэрэгтэй бөгөөд энэ үүргийг гүйцэтгэхээр оюуны баялаг бүтээгчид хүч нэмж эхэлсэн юм.
“Эрдэмтдийн зөвлөл”-ийн даргаар Ерөнхийлөгчийн Үйлдвэр, үйлчилгээний бодлогын зөвлөх Доктор ( PhD), профессор Ч.Даваабаяр томилогдож, хурлыг даргалав. Мөн Анхдугаар хуралд Ерөнхийлөгчийн Эдийн засгийн бодлогын зөвлөх Б.Даваадалай оролцож санал солилцлоо.
Анхдугаар хурлаар дараах шийдвэрүүд гарлаа. Үүнд:
1. “Эрдэмтдийн зөвлөл”-өөс ХХАА-н салбарт ажиллах төлөвлөгөө, салбарын үндсэн зураглалыг гаргаж, батлуулах
2. “Эрдэмтдийн зөвлөл”-ийн ажиллах дүрэм боловсруулж батлуулах
Хүнс, хөдөө аж ахуйн салбар бол Монгол Улсын тусгаар тогтнол, аюулгүй байдлын баталгаа, хүн ардын аж амьдралын эх үндэс юм.
Тиймээс Монгол Улсын Ерөнхийлөгч У.Хүрэлсүх нийгэм, эдийн засаг, хөгжил дэвшлийн гол уламжлалт салбар болох хүнс, хөдөө аж ахуйн салбарыг улам эрчимжүүлэн хөгжүүлэх нь Монгол төрийн бодлогын тэргүүлэх чиглэл байх ёстой гэж үзэн “Хүнсний хувьсгал” болон өргөжиж буй “Хүнсний хангамж, аюулгүй байдал” үндэсний хөдөлгөөнийг санаачлан эхлүүлсэн.
Өсөн үржиж, урган төлждөг хөдөө аж ахуйн баялгаараа монголчууд бид дотоодын хэрэгцээгээ бүрэн хангахын зэрэгцээ, хүнс экспортлогч улс болж, дэлхийн хүнсний хангамж, аюулгүй байдалд өөрсдийн хувь нэмрийг оруулах нь энэхүү хөдөлгөөний зорилго юм.
Дэлхийн уур амьсгалын өөрчлөлтийн сөрөг нөлөө улам бүр эрчимжиж, хүний буруутай үйл ажиллагаанаас шалтгаалан газрын хөрс доройтож, цөлжилт, шороон шуурга нэмэгдэж буй энэ цаг үед хүнс, хөдөө аж ахуйн салбарыг байгаль орчинд ээлтэй, ногоон хөгжлийг дэмжих чиглэлд шинжлэх ухаанчаар хөгжүүлэх явдал нэн чухал байна.
Монголчууд бид байгалийн баялаг, газар нутгийн хэмжээгээрээ дэлхийд эхний 18-д жагсдаг бөгөөд нэг хүнд ноогдох мал сүргийн тоогоороо дэлхийд тэргүүлдэг орнуудын нэг.
Тиймээс 70 гаруй сая малынхаа ашиг шимийг бүрэн гүйцэд авч, эрүүлжүүлж, хүн ардынхаа хоол хүнс, аж амьдрал, улс орныхоо хөгжил дэвшлийг тэтгэхэд “Эрдэмтдийн зөвлөл” чухал үүрэг гүйцэтгэх ёстойг хуралдааны үеэр онцолж байв.
