Монгол Улсын Ерөнхийлөгчийн санаачилгаар орон даяар өрнүүлж буй “Хүнсний хувьсгал” үндэсний хөдөлгөөний хүрээнд Баянхонгор суманд 100 хүлэмжийг барьж байгуулан, эхний жилийн ургацаа хурааж байна.

Хүлэмжийн аж ахуй эрхлүүлэх ажлын хүрээнд нэгдсэн журмаар зохион байгуулалтад орж ажиллах хүсэлтэй иргэдийг бүртгэн тухайн цэгт ажиллуулж буй. Нийт 3.6 га талбайг ашиглан хүлэмж, гүн өрмийн худаг хоёр, стандарт жорлон, хогийн сав, таван тоннын дөрвөн ширхэг усны нөөцийн савыг байршуулж, 380 вольтын 300 метр цахилгаан шугам сүлжээ оруулан, хамгаалах хашааг тавьж тухайн бүсэд ажиллах иргэдийг бүрэн боломжоор хангажээ.

Ургамлыг экологийн хөрсгүй тариалах, үрслүүлэх, суулгац ургуулах, арчилгаа тордолгоо, хүнсний ногооны хортон шавьж, өвчлөлөөс хэрхэн сэргийлэх, тоног төхөөрөмжийг байршуулах, бордоогоор хангах, ургац хураалт, тээвэрлэлт, хадгалалт зэргийг орон нутаг тариаланчидтай хамтран хийж буйгаараа онцлог.

Энэхүү ажлын үргэлжлэл болж 10×50 хэмжээтэй өвлийн ухаалаг хүлэмжүүдийг барьж ашиглалтад оруулахаар бэлтгэл ажлыг хангаж эхэлжээ. Энэ хүрээнд БНХАУ-ын Гансу мужийн Жючуань хотын Хөдөө аж ахуйн технологи нэвтрүүлэлт үйлчилгээний мэргэжилтнүүд Баянхонгор аймагт ажиллаж, өвлийн хүлэмж барих ажилд аргазүйн зөвлөгөө өгч байгаа юм.

Баянхонгор сумын Засаг дарга Жючуань хотын даргатай байгуулсан гэрээний дагуу БНХАУ-ын Жючуань хотын засгийн газар, тус хотын Гадаад харилцааны алба, Хөдөө аж ахуйн технологийг сурталчлах үйлчилгээний төвтэй хамтран Баянхонгор аймагт нарны хүлэмжийн аж ахуйг хөгжүүлж буй ажил ийнхүү үр дүнгээ өгч байна.

Хамтын ажиллагааны хүрээнд Баянхонгорынхон өөрийн аймгийн газар зүйн байдал хөрс, ургамалд тохирсон тариалан эрхлэх, түүнтэй уялдуулан өөрийн нөөц бололцоогоор шинэ төрлийн хөрс бордоог гарган авах техник технологийн талаар мэдлэгтэй болж нутгийн хөрсөнд хүнсний ногоо, жимс жимсгэнээ нутагшуулж ургац арвин байна.

Өвлийн хүлэмжтэй болсноор Баянхонгор аймаг улирал харгалзахгүй төмс, хүнсний ногоо, нарийн ногоо зэрэг шинэ хүнсний ногоог хүнсэндээ хэрэглэх боломжтой болох юм.