“Намрын ногоон өдрүүд” үзэсгэлэн худалдаа ёсдүгээр сарын 11-12-нд Дорноговь аймгийн Сайншанд хотод болсон билээ.
Нутгийн тариаланчдын тарьж ургуулсан хүнсний ногоог хэрэглэгчдэд хүргэх, тэдний бизнес үйл ажиллагааг олон нийтэд сурталчлах, эрүүл аюулгүй хүнсээр хэрэглэгчдийг хангах зорилготой үзээсгэлэн худалдаанд нийт 12 сумын 106 иргэн, аж ахуйн нэгж байгууллага оролцлоо.
“Шинэ хөдөө” төслийн хүрээнд БНСУ-д үйлдвэрлэсэн хүлэмж, тармуур, комбайн, 20 трактор, усны нөөцийн сав зэргийг сумдын хүнсний ногоо эрхлэгч, компани аж ахуйн нэгжүүдэд энэ жил гардуулсан нь иргэд, аж ахуй нэгжүүдэд хамгаалагдсан хөрсний тариалан эрхлэх боломж нөхцөлийг бүрдүүлсэн аж.
Шилдэг төмс, хүнсний ногоо үйлдвэрлэгчээр Даланжаргалан сумын тариаланч Л.Лувсанпүрэв, шилдэг тарвас үйлдвэрлэгчээр Сайншанд сумын “Оюуншанд” ХХК, шилдэг даршилсан бүтээгдэхүүн үйлдвэрлэгчээр Айраг сумын тариаланч А.Батсайхан, шилдэг хүлэмжийн аж ахуй эрхлэгчээр Иххэт сумын тариаланч С.Мөнхбат, шилдэг сүү, сүүн бүтээгдэхүүн үйлдвэрлэгчээр Даланжаргалан сумын үйлдвэрлэгч Д.Эрдэнэчимэг, шилдэг гурилан бүтээгдэхүүн үйлдвэрлэгчээр “Хөх тэнгэрийн цахиур” ХХК, шилдэг өрхийн үйлдвэрлэгчээр Дэлгэрэх сумын үйлдвэрлэгч Ё.Цэндсүрэн, шилдэг жижиг дунд үйлдвэр эрхлэгчээр Сайхандулаан сумын “Их өлзийт хоршоо”, шилдэг зохион байгуулалттай сумаар Эрдэнэ сум тус тус шалгарав.
Үзэсгэлэн худалдааны үеэр хамгийн том тарвасыг нээлттэй дуудлага худалдаанд оруулахад 19 кг жинтэй тарвас 75 мянган төгрөгийн үнэ хүрсэн байна.
Ташрамд, Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хэрэгжилтийг орон нутагт эрчимжүүлэх, жижиг дунд үйлдвэрлэлийг дэмжих зорилгоор “Шинэ хөдөө” төслийг орон нутагт хэрэгжүүлж байна.
