Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Монголын оёдлын салбарын мэргэжлийн зөвлөлийн дарга Ж.Оюунчимэгийг хүлээн авч уулзлаа.
Хөнгөн үйлдвэрийн салбарт төрөөс хамгийн бага дэмжлэг авдаг нь оёдлын салбар бөгөөд жил ирэх тусам импортын бүтээгдэхүүнд зах зээлээ алдаж байна.
1992-2007 оны хооронд 30 мянган хүнийг ажлын байраар хангаж байсан оёдлын салбар уналтад орсоор, өнөөдөр 2600 хүнийг л ажлын байраар хангаж байна. Мөн зах зээлийн нийгэмд шилжсэнээр ихэнх үйлдвэрүүд хувьчлагдаж, ажилгүй болсон иргэд оёдлын салбарт ажиллах болсон нь тухайн үед дотоодын нийт бүтээгдэхүүний 29 хувийг бүрдүүлж байв. Гэвч өнөөдөр бид хувцас болон оёмол бүтээгдэхүүнээр гаднын улсуудаас 90 хувь хараат болжээ.
Иймд оёдлын салбарыг хөгжүүлэх, энэ салбарт ажиллагсдын ажлын байрыг хадгалж, импортын бараа бүтээгдэхүүн худалдан авч гадагш урсгаж буй их хэмжээний мөнгийг дотооддоо үлдээхийн тулд төрийн оролцоо дэмжлэг шаардлагатай байна гэдгийг Монголын оёдлын салбарын мэргэжлийн зөвлөлийн дарга Ж.Оюунчимэг хэлж байв.
