19 нэр төрлийн хүнсний бүтээгдэхүүнээр дотоодын хэрэгцээгээ бүрэн хангаж, цаашлаад экспортлогч улс болох зорилготой “Хүнсний хангамж, аюулгүй байдал” үндэсний хөдөлгөөний хүрээнд Монгол Улсын хүнс, хөдөө аж ахуйн салбарын үйлдвэрлэгч, баялаг бүтээгчид Франц улсын “La Boîte à Champignons” үйлдвэртэй танилцлаа.
Бизнес аяллыг Монгол Улсын Ерөнхийлөгчийн зөвлөх Ч.Даваабаяр ахаллаа.
Тус компани нь 2016 оноос хойш үйл ажиллагаа явуулж эхлэн, кофены шааранд 3 төрлийн мөөг тариалж байна. Кофены шааранд мөөг тарих нь илүү ашиг шим, амттай болгож, байгаль экологид ээлтэй үйл ажиллагаа явуулахад тус болдог гэв.
Тухайлбал Франц улсын аж ахуйн нэгжүүдэд хог хаягдлын асуудлаа шийдэхэд хүндрэл их байдаг, зөрчсөн тохиолдолд хатуу хариуцлага үүрдэг. Тиймээс тус компанид чухал түүхий эд буюу кофены шаарыг үнэгүй өгч, хаягдлыг нь шийдэж өгсөнд талархан төлбөр төлдөг байна. Нийт цугласан кофены шаарны 10 хувийг нь л ашигладаг. Харин үлдсэн 90 хувийг бордоо болгож байна.
Нийт 10 гаруй ажилчинтай. Нийгмийн сайн сайхны төлөө хөгжлийн бэрхшээлтэй, эрх зүйн хариуцлага үүрч, суллагдсан хүмүүсийг ажилд авдаг.
Өдөрт 100 кг мөөг зах зээлд нийлүүлж, 1 кг тутмыг нь 11 еврогоор худалдаалдаг.
Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөнийг санаачлан эхлүүлснээр дотоодын үйлдвэрлэгч, баялаг бүтээгчдэд олон төрлийн дэмжлэг үзүүлж байна. Үүний нэг нь “Баялаг бүтээгч-бизнес тур” аялал юм. Өнгөрсөн хугацаанд давхардсан тоогоор 300 орчим үйлдвэрлэгч 21 үндэсний онцлог үйлдвэрүүдтэй танилцан, хамтран ажиллах гэрээ байгуулж, мэдлэг туршлага солилцон ихээхэн үр дүн гаргасан. Иймд Монгол Улсын Ерөнхийлөгч У.Хүрэлсүх Франц улсад хийх төрийн айлчлалынхаа хүрээнд бизнес эрхлэгчдээ дэмжин, тус улсад бизнес аялал хийлгэж байна.
