Жил бүр уламжлал болгон зохион байгуулдаг “АРЬС ШИР НООС НООЛУУРАН БҮТЭЭГДЭХҮҮН – 2023” нэгдсэн арга хэмжээ өнөөдөр Мишээл Экспо олон улсын үзэсгэлэнгийн танхимд нээлтээ хийлээ.
Нээлтийн арга хэмжээнд
- Монгол улсын Ерөнхийлөгчийн тамгын газрын дэд дарга Б.Энх-Амгалан
- Монгол улсын Ерөнхийлөгчийн үйлдвэр, үйлчилгээний бодлогын зөвлөх Ч. Даваабаяр
- ХХААХҮЯ-ны төрийн нарийн бичгийн дарга Т.Жамбалцэрэн
- ХХААХҮЯ-ны Хөнгөн үйлдвэрийн бодлогын хэрэгжилтийг зохицуулах газрын дарга М. Дондогдорж
- Монголын ажил олгогч эздийн нэгдсэн холбооны гүйцэтгэх захирал Х.Ганбаатар
- ХХААХҮЯ-ны харьяа Хүнс хөдөө аж ахуй хөнгөн үйлдвэрийн судалгаа хөгжлийн төвийн захирал Б.Батхүү
- НҮБ-ын Аж үйлдвэр хөгжлийн байгууллага (UNIDO)-ийн төслийн удирдагч Г. Мөнхболор
- МАШҮХолбооны гүйцэтгэх захирал Т.Баярсайхан
- МННХолбооны гүйцэтгэх захирал Д. Алтанцэцэг
- МАШҮХолбооны дэд ерөнхийлөгч М. Бат-Очир
- МННХолбооны зөвлөх н.Ёндонсамбуу нарын албаны хүмүүс болон арьс шир, ноос ноолуурын салбарт хэрэгжиж буй олон улсын төслийн зохицуулагчид, банкны салбарынхан, мэргэжлийн холбооны удирдах зөвлөлийн гишүүд, үйлдвэрийн захирлууд, ажилтан, албан хаагчид зочид төлөөлөгчид оролцож байна.
Монголы арьс шир, ноос, ноолуур, оёдлын үйлдвэрлэлийн салбарын экспортын бүтээгдэхүүний чанар, стандартыг сайжруулах, экспортыг нэмэгдүүлэх, үйлдвэрлэгчдийн борлуулалтыг дэмжих, хэрэглэгчдийг нэг дороос худалдан авалт хийх нөхцөлийг бүрдүүлэх зорилготой тус арга хэмжээг ХХААХҮЯам, Монголын арьс ширний үйлдвэрлэлийн холбоо, Монголын ноос ноолуурын холбоо, Мишээл Экспо компани 17 дахь жилдээ хамтран зохион байгуулж байна.
Үзэсгэлэнд:
- Нэхий дээл, үслэг хувцас;
- Ноос, ноолууран нэхмэл, сүлжмэл хувцас;
- Савхин хувцас, арьсан гутал, цүнх;
- Хүнсний бүтээгдэхүүн;
- Бэлэг дурсгал, жижиг эдлэлээр төрөлжих ба энэ чиглэлээр үйлдвэрлэл, үйл ажиллагаагаа явуулдаг үндэсний томоохон үйлдвэрлэгчид болох ДАРХАН НЭХИЙ ХК, Дархан Минж ХХК, Булигаар ХК, Мон Ирээдүй ХХК, Агни ХХК, Брэнд Гутал ХХК, Алтай Кашимер ХХК, ГОВЬ ХК, ГОЁО ХХК, Блю Скай Кашмер ХХК зэрэг 100 гаруй аж ахуйн нэгж байгууллагууд оролцож байна.
Үзэсгэлэн 2023 оны аравдугаар сарын 19-23-ны өдрүүдэд үргэлжилнэ. Үндэсний үйлдвэрлэгчдээ дэмжин ирж, эх оронч худалдан авалт хийхийг уриалж байна.
