Монгол Улсын Ерөнхийлөгч Ухнаагийн Хүрэлсүх БНСВУ-ын Ерөнхийлөгч Во Ван Тыөнгийн урилгаар 2023 оны 11 дүгээр сарын 01-05-ны өдрүүдэд тус улсад төрийн айлчлал хийж байна.
Энэхүү төрийн айлчлалын хүрээнд “Монгол, Вьетнам -Бизнес тур” арга хэмжээ зохион байгуулагдаж байгаа бөгөөд Монголын 80 гаруй бизнес эрхлэгч Вьетнам улсын хүнс, хөдөө аж ахуй, сэргээгдэх эрчим хүчний үйлдвэрүүдтэй танилцаж байна.
Өнөөдөр буюу 2023 оны 11 нэгдүгээр сарын 3-ны өдөр Ханой хотын Нам Танг Лонг аж үйлдвэрийн паркт байрлах “Бао Мин” хүнсний үйлдвэрийн үйл ажиллагаатай танилцлав. Бизнес группийг Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ахлан ажиллалаа.
Ерөнхий захирал, хатагтай Нго Ти Тин, Маркетингийн албаны дарга ноён Вуонг Туан Минх болон компанийн ажилчид бизнес эрхлэгчдийг угтан авч, компанийн үйл ажиллагааг танилцуулав.
“Бао Мин” хувьцаат компани нь 2006 онд байгуулагдсан, ногоон будааны төрөл бүрийн жигнэмэг, бялуу, амттан үйлдвэрлэдэг БНСВУ-ын тэргүүлэгч үндэсний үйлдвэр юм.
“Бао Минь” үйлдвэр нь ISO 22000:2005 стандартад нийцсэн машин механизмын системтэй, орчин үеийн тоног төхөөрөмж, хүнсний аюулгүй байдал, эрүүл ахуйг бүрэн хангасан 2 үйлдвэр байртай, өдөрт 30 гаруй нэр төрлийн бүтээгдэхүүн үйлдвэрлэж савлах, хадгалах хүчин чадалтай.
Бүтээгдэхүүнээ BigC, VinMart, Lotte, Aeon, Co.opmart, зэрэг улс орон даяар супермаркет, агент, дистрибьютер, том жижиг хүнсний дэлгүүрээр худалдаалахаас гадна Tiki, Lazada, Shopee, Sendo зэрэг цахим худалдааны платформоор худалдаалдаг ажээ.
Бизнес эрхлэгчид тус улсын жижиг, дунд үйлдвэрлэл эрхлэгч, аж ахуйн нэгжийг дэмжих төрийн бодлого, авч хэрэгжүүлж буй арга хэмжээний талаар мэдээлэл сонсож, харилцан санал солилцлоо.
