Монгол Улсын Ерөнхийлөгч Ухнаагийн Хүрэлсүх Бүгд Найрамдах Социалист Вьетнам Улсын Ерөнхийлөгч Во Ван Тыөнгийн урилгаар 2023 оны 11 дүгээр сарын 01-05-ны өдрүүдэд тус улсад төрийн айлчлал хийх юм.
Айлчлалын үеэр Монгол Улсын Ерөнхийлөгчийн Тамгын газар, Гадаад харилцааны яам, Монгол Улсаас БНСВУ-д суугаа Элчин сайдын яам, Монголын Үндэсний Худалдаа Аж Үйлдвэрийн Танхим, “Хүнсний хувьсгал” ТББ хамтран бизнес форум болон бизнес аяллуудыг зохион байгуулж байна. Тус үйл ажиллагаанд урьдчилсан байдлаар 100 гаруй үйлдвэрлэгч бүртгүүлсэн бөгөөд 70 бизнес эрхлэгч бүрэлдэхүүнд багтах юм.
Монгол Улсын Ерөнхийлөгчийн санаачилгаар “Хүнсний хангамж, аюулгүй байдал” үндэсний хөдөлгөөн монгол орон даяар өрнөж эхэлсэн. Энэ хүрээнд төрийн тэргүүний гадаад айлчлалуудын бүрэлдэхүүнд багтсан бизнес эрхлэгч, үйлдвэрлэгчдийн үйл ажиллагаанд илүү их ач холбогдол өгөх болжээ. Тухайлбал гаднын томоохон үйлдвэр, үйлчилгээний салбаруудтай танилцуулах, туршлага судлах, хамтран ажиллах боломжийг нь нээж өгөх зорилгоор бизнес аяллуудыг зохион байгуулах жишиг Бүгд Найрамдах Франц улсад хийсэн төрийн айлчлалаас эхлэн тогтож байна.
Энэ удаагийн бизнес аялалд БНСВУ-ын хүнс, хөдөө аж ахуй, хөнгөн үйлдвэр, хүнд үйлдвэр, инженер технологи, аялал жуулчлал гэх мэт салбарын үйлдвэртэй танилцах хөтөлбөр гарчээ.
