Монгол Улсын Ерөнхийлөгч Ухнаагийн Хүрэлсүх БНСВУ-ын Ерөнхийлөгч Во Ван Тыөнгийн урилгаар 2023 оны 11 дүгээр сарын 01-05-ны өдрүүдэд тус улсад төрийн айлчлал хийлээ. Төрийн айлчлалын хүрээнд 2023 оны 11 сарын 1-ны өдөр Хүнс, хөдөө аж ахуй, хөнгөн үйлдвэрийн сайд Х.Болорчулуун, БНСВУ-ын Аж үйлдвэр, худалдааны сайд Нгуен Хонг Зиен нар “Цагаан будааны худалдааны тогтвортой нийлүүлэлтийн тухай санамж бичиг”-т гарын үсэг зурсан. Ингэснээр Вьетнам улсаас жил бүр 30,000 тонн хүртэлх цагаан будаа худалдан авч, Монголын зах зээлд нийлүүлэх боломж бүрдэв.
Вьетнам улсаас импортлох цагаан будааны чанарыг сайжруулах, худалдааны тогтвортой байдлыг хангахад чухал ач холбогдолтой энэхүү хэлэлцээр хийгдсэнтэй холбогдуулан 2023 оны 11 сарын 3-ны өдөр Монгол улсын 80 гаруй бизнес эрхлэгч Тхай Бинь хотод байрлах 50 жилийн түүхт “Тхай Бинь Сийд” корпорацын өндөр чанартай будааны үйлдвэрт зочиллоо.
Гүйцэтгэх захирал Транс Манх Бао болон удирдлагууд бизнес эрхлэгчдийг хүлээн авч, байгууллагын үйл ажиллагаагаа танилцуулж, санал солилцлоо.
Үндэсний үйлдвэрлэгчид БНСВУ-ын ууган хүнсний үйлдвэр “Тхай Бинь Сийд” корпорацийн үйл ажиллагаатай танилцлаа. Бизнес группыг Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ахлан ажиллав.
“Тхай Бинь Сийд” корпорац нь 1972 онд байгуулагдсан бөгөөд судалгаа, хүнс үйлдвэрлэл, газар тариалан, хөдөө аж ахуйн тоног төхөөрөмж, экспорт, импорт, үрийн туршилт, барилгын салбаруудад үйл ажиллагаа явуулдаг Вьетнам улсын ууган компани юм
Тус корпорац нь европ технологи бүхий өндөр чанартай үр боловсруулах 2 үйлдвэр, жилд 30.000 тн цагаан будаа үйлдвэрлэн боловсруулах хүчин чадалтай үйлдвэр, үрийн судалгааны лаборатори, туршилтын лаборатори, тариалангийн судалгааны хүрээлэн зэрэг үйлдвэрлэл, боловсруулалт хийх дэд бүтцийг бүрэн шийдсэн.
Мөн өөрийн гэсэн 152 га талбайд тариалсан сайн чанарын үрийг дотооддоо нийлүүлэхээс гадна экспортолж байна.
Thai Binh Seed нь чанарын удирдлагын тогтолцоо ISO 9001: 2008 ISO/IEC 17025-2005, TQM-ийг хэрэгжүүлсэн бөгөөд Ази, Номхон далайн үрийн холбооны гишүүн, Вьетнамын үрийн худалдааны нийгэмлэг (VSTA), Вьетнамын худалдаа, аж үйлдвэрийн танхим (VCCI), Тайландын Бинх аж ахуйн нэгжийн нийгэмлэг (TBEA) -ийн гишүүн бөгөөд 2012 оноос хойш шинжлэх ухаан, технологийн салбар луу орж үйл ажиллагаагаа өргөжүүлсэн юм.
