Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд зохион байгуулагдаж буй монголын хүнс, хөдөө аж ахуй, хөнгөн үйлдвэрийн салбарын үйлдвэрлэгчдийн “Монгол Вьетнам-Бизнес тур” аялал өнөөдөр /2023.11.03/ боллоо.
Энэ хүрээнд БНСВУ-ын Хоа Бинь Мужийн Лыөнг Сөн Аж үйлдвэрийн паркийн “Crc solar cell” нарны толины үйлдвэр, “Cap global introduction” машины шил арчигчийн үйлдвэр, “Nissin Manufacturing Vietnam Co” ямаха болон хонда мотоциклийн эд ангийн үйлдвэрүүдтэй тус тус танилцлаа.
Тодруулбал Монгол Улсын Ерөнхийлөгчийн тамгын газар, Гадаад харилцааны яам, Монгол Улсаас Бүгд Найрамдах Социалист Вьетнам улсад суугаа Элчин сайдын яам, Монголын Худалдаа аж үйлдвэрийн танхим, Хүнсний хувьсгал төрийн бус байгууллага энэхүү бизнес аяллыг хамтран зохион байгуулж байгаа бөгөөд МҮХАҮТ-ын дэд захирал Ц.Магнайбаатар аяллыг ахаллаа.
“Лыөнг Сөн” аж үйлдвэрийн парк нь Хоа Бинь мужийн “Ан Тхинь Хоа Бинь” үл хөдлөх хөрөнгийн хувьцаат компанийн хөрөнгө оруулалтаар бүтээн байгуулагдсан ба нийт 230 га талбай газрыг 50 жилийн хугацаатай ашиглахаар дэд бүтэц хөгжсөн газарт байрласан.
Хөдөө аж ахуйн гаралтай бүтээгдэхүүн боловсруулах, барилгын материал, нарны цахилгаан панель угсралт, өргөн хэрэглээний бараа бүтээгдэхүүний үйлдвэрлэл, байгаль орчинд ээлтэй аж үйлдвэрийг дэмжих зорилготой парк юм. 2010 онд анх байгуулагдсан энэхүү аж үйлдвэрийн парк 2019 онд нийт 100 үйлдвэрийн хүчин чадалтай дэд бүтцийн бүтээн байгуулалтыг хийж дуусгасан, одоо аж үйлдвэрийн паркийн бохир ус цэвэрлэх байгууламжийн ажил хийгдэж байгаа.