Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Ардчилсан Лаос Ард Улсад хийж байгаа төрийн айлчлалын хүрээнд “Монгол – Лаосын үзэсгэлэн, худалдаа” 2023 оны 11 сарын 6-ны өдөр тус улсын нийслэл Вьентьян хотноо амжилттай зохион байгуулагдаж хоёр улсын бизнес эрхлэгчдийн дунд В2В, Монгол Улсын экспортын бараа бүтээгдэхүүний танилцуулах үзэсгэлэн худалдаа боллоо.
Тэсогийн “Зөв” аарцны ундаа, коллагентай ундаа, “Баатар” брэндийн цай, “Гэгээ фүүдс”-ийн борцтой шөл, “Болор импекс”-ийн хагас боловсруулсан бүтээгдэхүүн зэрэг манай улсын малын гаралтай экспортын бүтээгдэхүүнүүд олны анхаарлыг ихээр татаж, худалдан авалт ихтэй байлаа. Лаосын зандан улаан модон эдлэл, гааны навчин үе мөчний тос, алдарт хар будаа, сүрлэн эдлэл зэрэг бүтээгдэхүүнүүд монголчуудын сонирхлыг ихээр татаж байв. Арга хэмжээг Монголын үндэсний худалдаа, аж үйлдвэрийн танхим, Лаосын үндэсний худалдаа, аж үйлдвэрийн танхим, Монгол Улсаас Лаос Улсад суугаа Элчин сайдын яам хамтран зохион байгуулав.
Монгол Улсын Ерөнхийлөгчийн төрийн айлчлалын хүрээнд хүнс, хөдөө аж ахуйтай холбоотой хэлэлцээрүүд хийгдсэн. Тухайлбал, “Мал эмнэлэг, мал амьтны хорио цээрийн тухай Монгол Улсын Засгийн газар болон Бүгд Найрамдах Ардчилсан Лаос Ард Улсын Засгийн газар хоорондын хэлэлцээр”т Монгол Улсын Засгийн газрыг төлөөлж Хүнс, хөдөө аж ахуй, хөнгөн үйлдвэрийн сайд Х.Болорчулуун, Бүгд Найрамдах Ардчилсан Лаос Ард Улсын Засгийн газрыг төлөөлж Хөдөө аж ахуй, ойн сайд Пэт Пумпипак нар гарын үсэг зурсан. Энэхүү хэлэлцээрийг байгуулснаар хоёр улсын хооронд мал, амьтан тэдгээрийн гаралтай бүтээгдэхүүн, түүхий эд болон мал, амьтны эм бэлдмэл, тэжээл зэрэг бүтээгдэхүүнийг импортлох, экспортлох болон дамжин өнгөрүүлэх явцыг хурдасгаж, мал эмнэлэг, мал амьтны хорио цээрийн нөхцөлийг хөнгөвчилнө.
“Ургамал хамгаалал, хорио цээрийн тухай Монгол Улсын Засгийн газар болон Бүгд Найрамдах Ардчилсан Лаос Ард Улсын Засгийн газрын хоорондын хэлэлцээр”-т Монгол Улсын Засгийн газрыг төлөөлж Хүнс, хөдөө аж ахуй, хөнгөн үйлдвэрийн сайд Х.Болорчулуун, Бүгд Найрамдах Ардчилсан Лаос Ард Улсын Засгийн газрыг төлөөлж Хөдөө аж ахуй, ойн сайд Пэт Пумпипак нар гарын үсэг зурсах. Хэлэлцээрээр ургамал, ургамлын гаралтай бүтээгдэхүүнд хөнөөлтэй хортон шавьж хоёр улсын нутаг дэвсгэрт тархахаас урьдчилан сэргийлэх, хамгаалах болон хоёр улсын хоорондын ургамал, ургамлын гаралтай бүтээгдэхүүн, үрийн худалдааг хөнгөвчлөх боломжийг бүрдүүлнэ.
