Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон “Хүнсний хувьсгал” ТББ-ын УЗ-ийн гишүүн Г.Энхбилэг, “Хүнсний хувьсгал” ТББ-ын УЗ-ийн гишүүн Т.Мөнхтөр нар БНСВУ-ын хүнс, хөдөө аж ахуйн салбарын манлайлагч “DABACO” группийн үйл ажиллагаатай танилцлаа.
Мөн “DABACO” группын Ерөнхий захирал, БНСВУ-ын Хөдөлмөрийн баатар, 14-р Үндэсний Ассамблейн гишүүн Нгуен Нху Со группын үйл ажиллагаагаа танилцуулж, талууд хамтран ажиллах нөхцөл боломжийн талаар санал солилцлоо.
Тус групп нь БНСВУ-ын хамгийн том инновац, технологи шингэсэн, үйл ажиллагааны цар хүрээ өргөн байгууллага юм. Малын тэжээлийн 6 үйлдвэр, гахай, тахианы аж ахуй, хөрөнгө оруулалт, худалдаа үйлчилгээ, хүнсний боловсруулалтын чиглэлээр үйл ажиллагаа явуулдаг бөгөөд 25 жилийн хугацаанд ашиг орлогогүй компаниас салбарынхаа ноён оргил болтол ахиж дэвшиж чаджээ. Өнөөдрийн байдлаар тус компанийн ашиг орлого жилд 25-30 их наяд VND буюу 1 тэрбум гаруй ам.долларт хүрчээ.
Энэ амжилтад хүрэхэд тус группийн Ерөнхий захирал Нгуен Нху Со хамгийн том үүрэг гүйцэтгэжээ. Тэрээр 25 жилийн өмнө бараг 0 хөрөнгөтэй байсан компанийг хүлээн авсныхаа дараа малын тэжээл, үржүүлэгч үйлдвэрлэх бизнесийн шинэ чиглэл олохоор шийдсэн байна. Мөн ашиг орлогоо нэмэгдүүлэхийн тулд хөдөө аж ахуйн салбарт сүүлийн үеийн дэвшилтэт технологийг ашиглан шинэчлэл хийх зорилт тавив. Түүний энэ зорилго биеллээ олж, Вьетнам улсын хамгийн нөлөө бүхий групп компани болжээ.
Энэ их мэдлэг туршлагаа монголоос ирсэн төлөөлөгчидтэй хуваалцаж байгаадаа тэрээр баяртай байна гэв. Мөн цаашид Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөний хүрээнд хамтарч ажиллах бүхий л боломжийг эрэлхийлнэ гэдгийг талууд илэрхийлснээр уулзалт амжилттай өндөрлөлөө.
