Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд ”Грийн групп”-ийн Гүйцэтгэх захирал Б.Алтангэрэл, Стратеги төлөвлөлтийн газрын захирал Л.Мягмаржав нарыг хүлээн авч уулзлаа.
Уулзалтаар Хүнсний хувьсгалын хүрээнд хүнс, хөдөө аж ахуйн салбарын баялаг бүтээгчдэд төрөөс олгож буй дэмжлэгүүд болон үр дүнд нь Монгол улс экспортлогч орон болох төр хувийн хэвшлийн хамтын ажиллагааны талаар санал солилцлоо.
“Грийн Групп” ХХК анх 2007 онд үүсгэн байгуулагдсан бөгөөд дэлхийн улс орнуудын дээд зэрэглэлийн чанартай бараа, бүтээгдэхүүнийг импортлон Монголынхоо хэрэглэгчдэд хүргэдэг Слава брэндээр үйл ажиллагаагаа эхлүүлсэн. Байгуулагдсан цагаасаа хойш хоногт 100тн хүчин чадалтай “Сакура” үйлдвэр, хоногт 35 тонн бүтээгдэхүүн үйлдвэрлэх хүчин чадалтай Лапша гоймонгийн үйлдвэр, хоногт 15 тоннын хүчин чадалтай Лапша хэрчсэн гурилын үйлдвэр, Экспортын экосистемт 7,000м2 агуулах бүхий төвлөрсөн “Экспорт хаус” төсөл, долоон салаа зам бүхий дэд бүтцээр өдөрт 50 вагон, нийт 2500 тонн бараа бүтээгдэхүүн хүлээн авах чадалтай тээвэр ложистикийн үйлдвэр, хоногт 60 тоннын хүчин чадалтай “Талын Монгол” брэндийн хагас боловсруулсан махны үйлдвэр зэргийг ашиглалтанд оруулан, үйл ажиллагаагаа явуулж байна.
