Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Эдийн засгийн бодлогын зөвлөх Б.Даваадалай болон хөдөлгөөнийг эрчимжүүлэх, үр дүнтэй хэрэгжихэд чиглүүлэх зорилгоор байгуулагдсан хүнс, хөдөө аж ахуйн холбоодын нэгдэл “Хүнсний хувьсгал” ТББ-ын гишүүд Монгол Улсын Их Хурлын дарга Г.Занданшатар, Улсын Их Хурлын Эдийн засгийн байнгын хорооны дарга Ц.Цэрэнпунцаг, Улсын Их Хурлын даргын ахлах зөвлөх Д.Лүндээжанцан нартай уулзаж, санал солилцлоо.
Улсын Их Хурал импортыг орлох, экспортыг нэмэгдүүлэх баялаг бүтээгчдээ дэмжих татварын суурь шинэчлэл хийхээр ажиллаж байгаа бөгөөд энэхүү ажлыг хэрэгжүүлэхэд үйлдвэрлэгчдийн идэвх санаачлага, манлайлал томоохон нөлөө үзүүлнэ гэдгийг уулзалтын үеэр онцолж байв. Мөн “Хүнсний хувьсгал” үндэсний хөдөлгөөнийг үр дүнтэй хэрэгжүүлэхэд татварын орчныг бүрдүүлж буй бодлого, шийдвэрүүдийг сайжруулах шаардлагатай гэлээ.
“Хүнсний хувьсгал” ТББ албан ёсоор байгуулагдсанаасаа хойш идэвхтэй ажиллаж байгаа бөгөөд Монгол Улсын Ерөнхийлөгч, Ерөнхий сайд, УИХ-ын дарга, НЗДТГ-ын дарга нартай уулзан нийт баялаг бүтээгч, үндэсний үйлдвэрлэгчдийн дуу хоолойг хүргэн, амьдралд хэрэгжих, бодитой шийдвэр гаргуулахаар мэдлэг, туршлагаа хуваалцаж байна.
