Монгол Улсын Ерөнхийлөгч Ухнаагийн Хүрэлсүх Үндэсний эрх чөлөө, тусгаар тогтнолоо сэргээн мандуулсны 112 жилийн ойг тохиолдуулан зарлиг гаргаж, нэр бүхий эрхмүүдэд төрийн дээд цол, одон, медаль хүртээв.
АЖ ҮЙЛДВЭРИЙН ГАВЬЯАТ АЖИЛТАН ЦОЛООР:
- “Таван богд трейд” ХХК-ийн Дотоод аудит хариуцсан захирал Цагаачийн Оюунцэцэг,
- “Эм Си Эс Кока Кола” ХХК-ийн гүйцэтгэх захирал Лувсандашийн Мягмаржав
- “Улаанбаатар хивс” ХК-ийн зөвлөх, Монгол Улсын зөвлөх инженер Ёндонжамцын Энхтөр нарыг шагналаа.
Ц.Оюунцэцэг нь Таван Богд Группийн үүсгэн байгуулагчдын нэг бөгөөд 1995 онд Японы алдарт Фүжифилм гэрэл зургийн лабораторийг, Монгол улсад оруулж ирэн, шинэ залуу хамт олноо, цоо шинэ бизнесийг чадварлаг удирдан богино хугацаанд иргэддээ таниулан, орон даяар олон салбартай болгоход хувь нэмрээ оруулан ажиллаж буй юм.
“Таван Богд групп нь “Хүнсний хувьсгал” үндэсний хөдөлгөөний хүрээнд “Монбийф” брэндээ нэвтрүүлээд байгаа бөгөөд Төв аймгийн Сэргэлэн суманд малчны хотноос мал эмнэлгийн хяналт, үзлэг, шинжилгээнд хамрагдсан мал эмнэлгийн гэрчилгээ бүхий гарал үүсэл тодорхой үхрийг ферм дээр авчирч, 100 хоногийн турш органик өвс, тэжээлээр тэжээдэг. Монбийф фермийн аж ахуйн хувьд шинжлэх ухааны үндэслэлтэйгээр үхрийн тэжээлийг бэлтгэдэг нь тухайн үхрийн өсөлтийн эрчим, хоногийн нэмэгдэл жинтэй уялдуулан тэжээлийн жорыг шинэчлэн өөрчилснөөр мал аж ахуйн салбарын хөгжилд инновоци шингээсэн, гарал үүслийн баталгаатай, эрүүл үхрийн махыг хэрэглэгчдэд хүргэдэг юм
“Эм Си Эс Кока Кола” ХХК-ийн гүйцэтгэх захирал Л.Мягмаржав нь 2005 оноос хойш Монголын Сагсан Бөмбөгийг хөгжүүлэхэд гар бие оролцож, ивээн тэтгэж, удирдан зохион байгуулж ажилласаар ирсэн бөгөөд Монгол улсад зохион байгуулагдсан FIBA 3X3 болон FIBA олон улсын сагсан бөмбөгийн тэмцээнүүд болон бүхий л ажил, амжилтын ард байж Монгол улсыг багийн спортоор Олимпын наадамд оролцоход ихээхэн хувь нэмэр оруулсан эрхэм юм.
Мөн “Эм Си Эс Кока Кола” ХХК нь Монгол Улсын Ерөнхийлөгчийн санаачилсан “Хүнсний хувьсгал”, “Эрүүл Монгол хүн” үндэсний хөдөлгөөнүүдийн хэрэгжилтийг хангах хүрээнд жил бүр 1-2 төрлийн бүтээгдэхүүний элсэн чихрийн агууламжийг бууруулах, үйлдвэрийн хаягдал ус цэвэршүүлэх байгууламж, хийн түлшээр ажилладаг утаагүй уурын зуухыг ашиглалтад оруулаад байна. Мөн 2030 он гэхэд борлуулсан ундааны бүх хуванцар саваа дахин боловсруулах зорилт тавьж, “Хуванцрын хаягдалгүй дэлхий” хөтөлбөр хэрэгжүүлж байна. Өнөөдрийн байдлаар “М-Си-Эс Кока Кола” ХХК нь 21 брэндийн 150 төрлийн ундаа, ус, жүүс, цай үйлдвэрлэн зах зээлд нийлүүлдэг бөгөөд 950 хүнийг ажлын байраар хангаж байна.
Улаанбаатар хотын анхны хивсний үйлдвэр “Улаанбаатар хивс” ХК нь 1971 онд ашиглалтанд орсноос хойш өнөөг хүртэл 52 жил үйл ажиллагаагаа тасралтгүй явуулж байгаа үндэсний томоохон үйлдвэрлэгч юм. Тус үйлдвэр монгол хонины ноосыг ээрэх, будах, нэхэх, гүйцэтгэн боловсруулах гэсэн хивс үйлдвэрлэлийн иж бүрэн дамжлагуудаар боловсруулан, эцсийн бэлэн бүтээгдэхүүн болох 100 % ноосон, нарийн нэхээстэй Улаанбаатар, Алтанбулаг, Саян, Алтан-Өргөө зэрэг нэр төрлийн хивснүүдийг үйлдвэрлэж, зах зээлд нийлүүлж байна.
