Өнөөдөр /2024.01.04/ “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолыг хэрэгжүүлэгч төрийн байгууллагуудын тус тогтоолын шалгуур үзүүлэлтийг шинэчлэх тухайн жилийн хүрэх түвшинг тодорхойлох ажлын хэсгийн дүгнэлтийн хурал Төрийн ордны Нутгийн удирдлагын танхимд зохион байгуулагдлаа. Уулзалтад:
- Ерөнхийлөгчийн Үйлдвэр, үйлчилгэээний бодлогын зөвлөх Ч.Даваабаяр
- Ерөнхийлөгчийн эдийн засгийн бодлогын зөвлөх Б.Даваадалай болон бусад ажлын хэсгийн гишүүд оролцлоо.
Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд УИХ-аас “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолыг батлан гаргасан. Тус тогтоол нь 5 бүлэг 114 үйл ажиллагаанаас бүтэх бөгөөд төрийн 35 байгууллага хамтран хэрэгжүүлж байна.
Эдгээр 35 төрийн байгууллага албан ёсоор дэмжихээ илэрхийлж, нэгдэж эхэлснээс хойш 6 сар тутамд зөвлөлдөх уулзалт зохион байгуулж, үр дүн, тулгамдаж буй асуудал, шийдвэрлэх арга замын талаар ярилцаж байна.
Энэ удаагийн уулзалтаар 5 төрлийн дүгнэлт бичиж, цаашдын үйл ажиллагаандаа баримтлахаар шийдвэрлэлээ.Үүнд:
- Эрх зүйн орчинг боловсронгуй болгох
- 19 гол нэр төрлийн хүнсний бүтээгдэхүүн тус бүр дээр тодорхой тоо баримт гарган, үр дүнг нь тодорхойлох
- Аж ахуйн нэгжүүдийн өөрийн хөрөнгөөр бий болгосон бүтээн байгуулалт, гадаадын зээл тусламж зэргийг хамруулан нийт хүнс, хөдөө аж ахуйн салбарт хэчнээн төгрөгний санхүүжилт тоо баримтыг тодорхой болгох
- Хэрэгжүүлж буй арга хэмжээнүүд бүсчилсэн хөгжлийн бодлоготой хэрхэн уялдаж байна
- Цаашид хэрхэн ажиллах вэ? гэх мэт асуудлын хүрээнд дүгнэлт бичих юм.
2023 онд хүнс, хөдөө аж ахуйн салбарт нийт 830 тэрбум төгрөгний хөнгөлөлттэй зээл олгосон бөгөөд 580,6 тэрбум төгрөгийг хүнсний боловсруулах үйлдвэрт олгосон байна. Мөн нийт зээлийн 68,9 хувийг Улаанбаатар хотын үйлдвэр, аж ахуйн нэгжид олгожээ. Иймд 2024 онд хүнс, хөдөө аж ахуйн салбарт үзүүлж буй санхүүгийн дэмжлэгийг бүсчилсэн хөгжлийн бодлоготой уялдуулан олгож, тус салбартай холбогдох 30 орчим төрөлд тэнцвэртэй хуваарилах нь зөв гэж үзлээ.
Мөн УИХ-ын 36-р тогтоолын хүрээнд хэрэгжүүлэх 114 үйл ажиллагааг нэг бүрчлэн шалгаж, хэрэгжих боломж нөхцөлийг тодорхойлох, үйл ажиллагаа тус бүрийг эзэнжүүлэх шаардлагатай байгааг онцлов.
