Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон “Хүнсний хувьсгал” ТББ-ын удирдах зөвлөлийн гишүүд, хүнс, хөдөө аж ахуйн салбарын баялаг бүтээгчдийн төлөөллүүд өнөөдөр Монгол Улсын Засгийн газрын гишүүн, Монгол Улсын Шадар сайд С.Амарсайхан болон шадар сайдын эрхлэх асуудлын хүрээний агентлагын удирдлагуудтай уулзалт хийв.
Уулзалтаар Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөнийг хэрэгжүүлэх ажлын хүрээнд төр хувийн хэвшил хэрхэн үр дүнтэй хамтран ажиллах талаар санал солилцлоо.
“Хүнсний хувьсгал” ТББ-ын зүгээс хүнс, хөдөө аж ахуйн салбарын өнөөгийн нөхцөл байдлыг танилцуулж хөдөө аж ахуйн бүтээгдэхүүний экспортыг нэмэгдүүлэх, хүнсний аюулгүй байдлыг хангах, дотоодын үйлдвэрлэгчдээ төрийн бодлогоор дэмжихэд анхаарч ажиллах шаардлагатай байгааг онцлов.
Мөн дэлхийн хүнсний байгууллагын мөрдлөг болгож буй гол гурван стандартыг дотооддоо бүрэн нэвтрүүлж экспортын шаардлагыг хангах, хүнс, хөдөө аж ахуйн салбарын үйлдвэрлэлийн баазыг бэхжүүлэх, мөн хүнсний лабораториудын үйл ажиллагааг сайжруулж импортын өмнөх болон дотоодын түүхий эдийн шинжилгээг нарийвчлан гаргах, дотоодын үйлдвэрлэгчдийг төрийн худалдан авалтаар дэмжих санал гаргав.
Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай хуулийн шинэчилсэн найруулга 2024 оны 1 дүгээр сарын 01-ний өдрөөс хэрэгжиж эхэлж байгаа юм.
Шадар сайд С.Амарсайхан төрөөс хэрэгжүүлдэг хүнсний чиглэлийн худалдан авалтад дотоодын үйлдвэрлэгчид оролцох нөхцлийг бүрдүүлэх, импортын бараа бүтээгдэхүүнд тавих хяналтыг сайжруулж, үндэсний үйлдвэрлэгчдээ хамгаалсан мэргэжлийн байгууллагуудын хөшүүрэг бүрдүүлэн ажиллахыг Төрийн худалдан авах ажиллагааны газар, Стандарт хэмжил зүйн газар, Шударга өрсөлдөөн хэрэглэгчдийн төлөөх газар, Үндэсний итгэмжлэлийн төв, Хүнсний аюулгүй байдлын үндэсний лавлагаа лабораторийн дарга нарт үүрэг болгож, уулзалтаас гарсан санал хүсэлтийг нэн даруй шийдвэрлэж, хариу хүргүүлэхийг үүрэг болгов.
Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөнийг шинжлэх ухаанд тулгуурлан, амьдралд бүтээлчээр үр дүнтэй хэрэгжүүлэх зорилгоор төр хувийн хэвшил хамтарсан ажлын хэсэг, хороод байгуулагдаад байна. Тухайлбал,
- Хүнс, хөдөө аж ахуйн салбарын Эрдэмтдийн Зөвлөл,
- УИХ-ын “Хүнсний хангамж, аюулгүй байдлыг хангах талаар авах зарим арга хэмжээний тухай” 36-р тогтоолын хэрэгжилтийг эрчимжүүлэх 2 ажлын хэсэг,
- Монгол Улсын Ерөнхий сайдаар ахлуулсан “Хүнс, хөдөө аж ахуйн салбарыг дэмжих үндэсний хороо”
- Хүнс, хөдөө аж ахуйн мэргэшсэн холбоодын нэгдэл “Хүнсний хувьсгал” ТББ байгуулагдсан.
Дээрх ажлын хэсгүүдийг Монгол Улсын Ерөнхийлөгчийн Тамгын газраас Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Эдийн засгийн бодлогын зөвлөх Б.Даваадалай, ЕТГ-ын Хүнсний төсөл, хөтөлбөрийн албаны дарга А.Амаржаргал тэргүүтэй албаны хүмүүс хариуцан ажиллаж байна.
