Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр өнөөдөр Дархан-Уул аймгийн баялаг бүтээгч “Дархан Халдун” ХХК-ийн Үүсгэн байгуулагч Б.Батмөнх, гүйцэтгэх захирал Ё.Баттуяа, Ё.Долгормаа нарыг хүлээн авч уулзлаа.
Уулзалтаар “Дархан Халдун” ХХК 2024 оноос хийж хэрэгжүүлэх ажлын төлөвлөгөөгөө танилцуулав.
Дархан Халдун ХХК нь 2004 оноос зайрмаг, сүү сүүн бүтээгдэхүүний үйлдвэрлэл, бялуу, нарийн боов, гурилан бүтээгдэхүүн үйлдвэрлэл, бууз банш үйлдвэрлэл, зайрмагны торхон аяга үйлдвэрлэл зэрэг хүнсний салбарт ажиллаж ирсэн бөгөөд Ерөнхийлөгчийн санаачилсан “Хүнсний хувьсгал”, “Тэрбум мод” үндэсний хөдөлгөөнүүдийн хүрээнд “САЙХАН ФЕРМ” хөдөө аж ахуйн жишиг салбараа байгуулан милба сортын алим үржүүлэг, беричон үүлдэрийн хонь, семинтал үүлдэрийн үхэр үржүүлэхээс гадна эрдэнэшишийг эх орны хөрсөнд амжилттай тариалан “САЙХАН ТЭЖЭЭЛ” эрдэнэшишийн дарш үйлдвэрлэж буй юм.
Үүсгэн байгуулагч Б.Батмөнх “Монгол Улсын Ерөнхийлөгч болон Ерөнхийлөгчийн зөвлөхүүд үндэсний үйлдвэрүүдэд ажиллаж, орон нутгийн баялаг бүтээгчидтэй санал солилцон тулгамдсан асуудал бүрийг шийдвэрлэж, арга хэмжээ авч байгаа нь баялаг бүтээгч бидэнд томоохон дэмжлэг болж байна. Дархан Халдун ХХК нь өнөөдрийн байдлаар Францын беричон үүлдэрийн F1 үеийн 1,2 настай төл хүлээн авч амжилттай өсгөж байгаа бөгөөд тус үүлдрийн 20 хуц, Барга, үзэмчин баяд үүлдэрийн үржлийн 1000 эх хоньтой. Ирэх ондоо F2 эрлийз төл хүлээн авах төлөвлөгөөтэй. Цаашид малын тэжээлээ тариалж хонь, үхрийн фермээ хөгжүүлэн мах, сүүгээр эцсийн бүтээгдэхүүн үйлдвэрлэн зах зээлд нийлүүлэх, цаашлаад экспортонд гаргах тэргүүн зорилготой ажиллаж байна” гэв.
