Монгол Улсын Ерөнхийлөгч Ухнаагийн Хүрэлсүх үндэсний үйлдвэрлэгчидтэй уулзаж, санал хүсэлтийг сонсохдоо хонины ноосыг 100 хувь эдийн засгийн эргэлтэд оруулах нөхцөл бүрдүүлэхийг чиглэл болгосон. Энэ хүрээнд өнөөдөр Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Эдийн засгийн бодлогын зөвлөх Б.Даваадалай нар ХХААХҮЯ-ны Хөнгөн үйлдвэрийн бодлогын хэрэгжилтийг зохицуулах газрын дарга М.Дондогдорж, Хөнгөн үйлдвэрийн бодлогын хэрэгжилтийг зохицуулах газрын шинжээч Ч.Болдбаатар нарыг хүлээн авч уулзлаа.

Уулзалтаар Эмээлт, Дархан, баруун, зүүн бүсийн хөдөө аж ахуйн үйлдвэрлэл технологийн парк, ноос ноолуурын салбарт “Монголын Хаан Ширхэгт” чанарын гэрчлэх тэмдгийг олон улсын болон дотоод зах зээлд таниулах, хөнгөн үйлдвэрлэлийн салбарт ажиллах боловсон хүчнийг бэлтгэх, хөнгөн үйлдвэрлэлийн салбарыг санхүү хөрөнгө оруулалтаар дэмжих салбарын зорилтууд, тулгамдаж буй асуудалтай танилцаж, санал солилцов.

Хөнгөн үйлдвэрийн салбарт нийт 3200 орчим аж ахуй нэгж, үйлдвэр үйл ажиллагаа явуулж, 44000 хүнийг ажлын байраар хангаж байна.

Ноос ноолуур, арьс шир, оёдол, тавилга модон эдлэл, хэвлэл, сав баглаа боодол, дахин боловсруулах, гоо сайхан зэрэг тус салбарын үйлдвэрлэлийн хэмжээ 2.2 ихнаяд төгрөг бөгөөд гадаад борлуулалт 790 сая ам.долларт хүрчээ.

Тус салбарт ажиллаж буй ихэнх аж ахуй нэгжүүд “Жижиг, дунд үйлдвэрлэлийг дэмжих сан”-гийн зээл, арилжааны банкуудын санхүүжилт, өөрсдийн нөөц бололцоогоор үйл ажиллагаагаа явуулж байна. Иймд “Хүнсний хувьсгал” үндэсний хөдөлгөөнтэй уялдуулан хөнгөн үйлдвэрлэлийн салбарыг санхүү хөрөнгө оруулалт, дотоодын худалдан авалтаар дэмжиж шаардлагатай.