Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр үндэсний үйлдвэрлэгч “Альфа Филтер” ХХК-д ажиллалаа.
Өнөөдөр /2024.01.18/ Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Төрийн худалдан авах ажиллагааны газрын холбогдох албан тушаалтнуудын хамт Хан-Уул дүүргийн 2 дугаар хороонд байрлах “Альфа Филтер” ХХК-ийн шүүлтүүрийн үйлдвэрийн үйл ажиллагаатай танилцан, санал хүсэлтийг сонслоо.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Монгол Улсын Ерөнхийлөгч Ухнаагийн Хүрэлсүх дотоодын үйлдвэрүүдээ худалдан авалтаар дэмжиж хүн бүр эх оронч худалдан авалт хийхийг уриалсан. Энэ хүрээнд Ерөнхийлөгч төдийгүй ЕТГ-ын зүгээс хүнс, хөдөө аж ахуй, хөнгөн үйлдвэрийн салбарын үйлдвэрлэгчдэд анхаарал хандуулж үйлдвэрийн үйл ажиллагаатай танилцан, холбогдох төрийн байгууллагуудыг ч мөн адил үйлдвэрлэгчидтэй уулзаж, тэдний санал хүсэлтийг сонс гэдэг шаардлага тавьж байгаа. Энэ нь дотооддоо үйлдвэрлэсэн, нэмүү өртөг шингэсэн бараа, бүтээгдэхүүнийг төрийн байгууллагын төлөөлөлд таниулах, цаашид төрийн худалдан авалтын үйл ажиллагаанд оролцон бизнесээ өргөжүүлэх, нэр хүндээ өсгөх, ажлын байрыг хадгалах, ашиг орлогоо нэмэгдүүлэх боломжийг үйлдвэрлэгчдэд олгож буй явдал юм. Тендер шалгаруулалттай холбоотой ирүүлсэн хүсэлтийн дагуу тус үйлдвэрийн үйл ажиллагаатай танилцаад байна.
“Альфа Филтер” ХХК-ийн Ерөнхий захирал И.Мөнхбат: Монгол Улсын Ерөнхийлөгч Ухнаагийн Хүрэлсүх дотоодын үйлдвэрүүдээ худалдан авалтаар дэмжиж хүн бүр эх оронч худалдан авалт хийхийг уриалсан. Тэрээр мөн Монгол Улсын Ерөнхий сайд байх хугацаандаа Засгийн газрын 59 дүгээр тогтоол, Засгийн газрын 2019 оны 90 дүгээр тогтоолыг шинэчлэн баталж “Төрийн худалдан авалтыг дотоодын үйлдвэрлэгчдээс авах” арга хэмжээг авч хэрэгжүүлэх чиглэл өгч байсан. Гэвч үндэсний үйлдвэрлэгч нарт тендер шалгаруулалттай холбоотой асуудлууд тулгарсаар л байна. Төр засгийн бодлого шийдвэрүүд бодит ажил хэрэг болоосой гэсэндээ Ерөнхийлөгчийн тамгын газарт хандан үйлдвэрээ танилцуулахыг хүссэн. Хүсэлтийн дагуу Ерөнхийлөгчийн зөвлөх Ч.Даваабаяр Төрийн худалдан авах ажиллагааны газрын холбогдох албан тушаалтнуудын хамт манай үйлдвэрт ирж танилцаж байгаад талархаж байна.
‘’Альфа фильтер’’ ХХК нь олон улсын стандартын шаардлагыг хангасан түүхий эд материалаар төрөл бүрийн тоног төхөөрөмжийн агаарын шүүлтүүр, бүх төрлийн авто машины агаар, тос, түлш, гидрийн шүүлтүүрүүдийг эх орондоо үйлдвэрлэж байна. Өдгөө монгол улсын дотоодын нийт хэрэгцээний 10 орчим хувийг дангаараа ханган нийлүүлж байна.
Олон улсын чанарын тогтолцооны ISO9001:2015, Хөдөлмөрийн аюулгүй байдал эрүүл ахуйн менежментийн тогтолцооны ISO45001:2018, Байгаль орчны менежментийн ISO14001:2015 зэрэг стандартуудыг үйл ажиллагаандаа нэвтрүүлснээр ОУ-ын тодотголтой монголдоо анхдагч бүх төрлийн автомашин, тоног төхөөрөмж, барилга байгууламжийн шүүлтүүр үйлдвэрлэгч болж чадсан хэмээн Үйлдвэрлэл, санхүү хариуцсан дарга Энхнаран танилцууллаа.
