Монгол Улсын Ерөнхийлөгч Ухнаагийн Хүрэлсүх хөнгөн үйлдвэрийн салбарыг дэмжин “ЦАГААН АЛТ” үндэсний хөтөлбөр хэрэгжүүлэх, хонины ноосыг 100 хувь эдийн засгийн эргэлтэд оруулах нөхцөл бүрдүүлэхийг чиглэл болгосны хүрээнд Ерөнхийлөгчийн Хот, хөдөөгийн хөгжлийн бодлогын зөвлөх З.Мэндсайханаар ахлуулсан ажлын хэсэг байгуулагдсан.
Ажлын хэсгийн анхдугаар хурал өнөөдөр буюу 2024 оны гуравдугаар сарын 04-ний өдөр Төрийн ордны Үндсэн хууль танхимд зохион байгуулагдаж байна. Хурлаар хөнгөн үйлдвэрийн салбарын өнөөгийн байдал, хэрэгжүүлж буй арга хэмжээний талаар хэлэлцэж байна.
Уг ажлын хэсэг нь хөнгөн үйлдвэрлэлийг хөгжүүлэх, нэмүү өртөг бүтээх, эцсийн бүтээгдэхүүн үйлдвэрлэлийг дэмжих чиглэлээр бодлого, үйл ажиллагааны төлөвлөгөө болон санхүүжилтийн талаар санал боловсруулан танилцуулах юм.
Хуралд Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай, Үйлдвэр, үйлчилгээний бодлогын зөвлөх Ч.Даваабаяр, ЕТГ-ын Хүнсний төсөл, хөтөлбөрийн албаны дарга А.Амаржаргал болон салбар яамд зэрэг ажлын хэсгийн гишүүд оролцож байна.
Манай улс 2023 онд нийтдээ 1,077.5 сая ам долларын импорт хийсэн ба импортын дийлэнх хувь буюу 52 хувийг мод, цаас, хуванцар, түүгээр хийсэн эдлэл буюу мод, хэвлэл, сав баглаа боодлын үйлдвэрлэлийн бүтээгдэхүүн эзэлж байна
Хөнгөн үйлдвэрийн экспортын голлох бүтээгдэхүүн болох нэхмэлийн салбарын экспортыг авч үзвэл олон улсад тархсан Ковид цар тахалтай холбоотойгоор 2020, 2021 онуудад тус салбарын экспорт унаж, бусад жилүүдэд тодорхой хэмжээгээр өсөлттэй байна. Угаасан ноолуурын экспорт 2023 онд 5,449.1 тн (263,9 сая. ам.долл) болж өмнөх оноос 15 хувиар буурсан бол самнасан ноолуурын экспорт 1,001.1 тн (95.9 сая. ам.долл) болж өмнөх оноос тоо хэмжээгээр 16.8 хувиар, үнийн дүнгээр 3.1 хувиар өссөн байна.
