Манай улс жилд 153 мянга 473 тонн химийн хортой болон аюултай бодис бүтээгдэхүүн импортолж байна. Тэгвэл БНСУ-аас өндөр нягтралтай полиэтилен HDPE буюу ОУ-ын чанарын гэрчилгээтэй түүхий эдийг ашигласан усны савыг “ЭКО УСНЫ САВ” ХХК дотооддоо үйлдвэрлэж байна. Тус үйлдвэрт Монгол Улсын Ерөнхийлөгчийн үйлдвэр, үйлчилгээний бодлогын зөвлөх Ч.Даваабаяр ажиллалаа.
Эко усны саванд ямар ч төрлийн хүнсний зориулалтын шингэн зүйл хадгалахад химийн урвалд орохгүй, хүчил шүлт бусад химийн идэмхий бодист тэсвэртэй шинж чанартай гэдгийг үйлдвэрлэгчид онцолж байна.
Хүнсний зориулалтын бус хуванцар савны найрлагад ордог химийн бодисууд хүнсний түүхий эд, бүтээгдэхүүнд шингэн, хүний биед орж хуримтлагдсаар олон төрлийн өвчний суурь шалтгаан болдог төдийгүй хорт хавдар үүсгэдэг тул дэлхий нийтээр ахуйн хэрэглээнд бүрмөсөн хориглосон ч манайд хэрэглээ өндөр хэвээр байна. Өрх дунджаар 20-100 литрийн багтаамжтай 3-4 ширхэг зориулалтын бус хуванцар савыг өдөр тутмын амьдралдаа ашигладаг. Судалгаанаас харахад 2.1-2.4 сая зориулалтын бус савыг монголчууд өдөр бүр хүнсний хэрэгцээндээ ашигласаар байна.
Энэ хэрээр иргэдийн эрүүл мэнд, амь насанд аюултай тул нийтээрээ зориулалтын бус хуванцар савны хэрэглээнээс татгалзаж, хортой бодисын савыг хүнсний хэрэглээнээс халья!
