“Мэргэжлийн нэгдсэн холбооны эрх зүйн байдлын тухай” хуулийн төслийн ажлын хэсэг хуралдлаа. Тус ажлын хэсгийг УИХ-ын гишүүн Б.Баттөмөр ахалж, УИХ-ын гишүүн Ц.Мөнх-Оргил, УИХ-ын гишүүн Ц.Мөнхцэцэг, УИХ-ын гишүүн Н.Энхболд, Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр нарын бүрэлдэхүүнтэй хуралдаж байна.

Манай улс анх 1997 онд Төрийн бус байгууллагын тухай хуулийг баталснаар иргэний нийгмийн байгууллагууд байгуулагдах эрх зүйн үндэслэл бүрдсэн. 2017 оны байдлаар 27 мянга гаруй төрийн бус байгууллага Хуулийн этгээдийн улсын бүртгэлийн газар бүртгэгдсэнээс 8000 орчим нь нийгэмд идэвхтэй үйл ажиллагаа явуулж байгаа гэсэн судалгаа байна. Эдгээр төрийн бус байгууллагууд дунд нийгэмд үйлчлэх зорилготой мэргэжлийн нэгдсэн холбоо гэх нэршилтэй байгууллагууд нэлээдгүй байгаа ч тэдний үйл ажиллагааг төрийн бус байгууллагын тухай хуулиар зохицуулж байна.

Тэгвэл “Мэргэжлийн нэгдсэн холбооны эрх зүйн байдлын тухай” хуулиар салбартаа хүлээн зөвшөөрөгдсөн мэргэжлийн нэгдсэн холбоо байгуулах нөхцлийг бүрдүүлж, цаашлаад төрийн байгууллага мэргэжлийн холбоодын хамтын ажиллагааг бэхжүүлэх боломж бүрдэнэ гэдгийг ажлын хэсгийн гишүүд онцолж байна.

Тус хууль батлагдсанаар дараах үр дагавар бий болно гэж үзэж байна.

• Мэргэжлийн нэгдсэн холбооны үйл ажиллагаа тогтвортой, мэргэшсэн байх нөхцөл бүрдэх;
• Төр, хувийн хэвшлийн түншлэл бүрдэх;
• Олон жижиг төрийн бус байгууллагууд нэгдэж цар хүрээгээ тэлэх,
• Төрийн байгууллагын шийдвэр гаргалтад иргэний нийгмийн ялангуяа мэргэжлийн байгууллагын үзүүлэх нөлөө нэмэгдэх;
• Мэргэжлийн нэгдсэн холбооны үйл ажиллагааны сахилга, хариуцлага нэмэгдэх