Монгол Улсын Ерөнхийлөгч У.Хүрэлсүх монгол малын арьс, ширийг боловсруулан нэмүү өртөг шингээн дэлхийн зах зээлд гаргах эрхэм зорилготой “Мон-Ирээдүй” ХХК-ийн арьс, боловсруулах үйлдвэрт ажиллалаа.
Тус үйлдвэр малын гаралтай түүхий эдийг чанарын өндөр түвшинд боловсруулж, бог малын арьсаар зөөлөн савхи, гутал эдлэлтийн зориулалттай шевро, гутлын дотор, бод малын ширээр гутал, цүнх, жижиг эдлэлийн шир боловсруулан дотоодын зах зээлд нийлүүлж байна. Харин хагас гүн боловсруулсан арьс, ширийг Итали, Испани, Турк, Япон, Вьетнам зэрэг улсруу экспортод гаргаж байна.
Малын гаралтай түүхий эдийг эдийн засгийн эргэлтэд оруулаад зогсохгүй кластерийн системээр хамтран ажиллаж, малын гаралтай арьс шир, түүхий эдийг эцсийн бүтээгдэхүүн болгож байна.
Тус компани арьс, шир зэрэг түүхий эдийг хагас боловсруулан олон улсын зах зээлд гаргахын зэрэгцээ бог малын арьсаар зөөлөн савхи, гутлын дотор эдлэлийн зориулалттай савхи, бодын ширээр гутлын дээд бие, цүнхний зориулалттай арьс, шир үйлдвэрлэж байна.
2020 онд салбартаа анхлан 2020 онд Олон улсын чанарын удирдлагын тогтолцоо ISO 9001 стандартыг хэрэгжүүлж, арьс ширний салбарын хөгжлийг шат ахиулжээ.
