“Хүнсний хувьсгал” ТББ-ын Удирдах зөвлөлийн гишүүн Б.Болдбаатар, Монголын сав баглаа боодол үйлдвэрлэгчдийн нэгдсэн холбоо (МСББҮНХ)-ны удирдлага болон Монгол Улс дахь НҮБ-ын Аж үйлдвэрийн хөгжлийн байгууллагын (UNIDO) төлөөллүүд хамтран Дэлхийн сав баглаа боодлын холбооны (WPO) Удирдах зөвлөлийн ээлжит 111 дугаар хуралд амжилттай оролцлоо. Тус хурал нь Тайланд улсын Бангкок хотноо 06 сарын 12-16-ны хооронд нийт 41 гишүүд, 29 орны төлөөллийн бүрэлдэхүүнтэйгээр болсон юм.
“Хүнсний хувьсгал” ТББ-ын Удирдах зөвлөлийн гишүүн Б.Болдбаатар уг хурлын удирдах зөвлөлийн хурал болон дугуй ширээний уулзалтаар засгийн газраас хэрэгжүүлж буй үндэсний хөтөлбөрүүд болон Монголын сав баглаа, боодол үйлдвэрлэлийн салбарын чухал асуудлуудыг хөндөж үг хэлэв.
Тус хурлын үеэр “Propak Asia 2024” олон улсын сав баглаа боодлын үзэсгэлэн болсон бөгөөд энэ нь Азийн бүсийн сав баглаа боодлын томоохон олон улсын үзэсгэлэнгүүдийн нэг юм. Азийн сав баглаа боодлын холбоо (APF)-ны төлөөлөгчдийн Дугуй ширээний уулзалт болж НҮБ-ын Аж үйлдвэрийн хөгжлийн байгууллагын (UNIDO) Хүнсний аюулгүй байдал, хүнсний системийн хэлтсийн дарга Али Бадарне оролцож, цаашдын хамтын ажиллагааны талаар санал солилцлоо.
Удирдах зөвлөлийн гишүүн Б.Болдбаатар Австралийн сав баглаа боодлын институтийн удирдлагуудтай уулзсан бөгөөд тус уулзалтаар Монголын сав баглаа боодлын салбарт сургалт хөгжил, мэргэжил арга зүйн тал дээр түлхүү хамтарч ажиллахаа илэрхийлсэн байна.