Завхан аймгийн брэнд сармай дээлт чихэр 99 дэх жилдээ үйлдвэрлэгдэж байна. 100 шахам жилийн түүхтэй Завхан баялаг үйлдвэрийн гол нэрийн бүтээгдэхүүн нь сармай дээлт.
Сармай дээлт нь хамгийн их борлуулалттай бүтээгдэхүүн юм. Тиймээс сармай дээлт чихрийн уламжлалт жорыг нь хадгалж, амт чанарыг нь улам сайжруулах, сав баглаа боодлыг нь шинэчилж, нэр төрлийг нь нэмснээр энэ чихрийн технологи нь уламжлагдаж сайжирсаар байгаа юм.
Манай чихрүүд чанах, хэвлэх, салгах, өнгөлөх, сэврээх, жинлэх, наах гэсэн долоон үе шатыг дамждаг. Ихэнх бүтээгдэхүүнүүд бүгд илчлэг ихтэй, химийн бодис ороогүй гэдгээрээ онцлог давуу талтай. Чихрийн агууламж ч бага.
Завханы брэнд бүтээгдэхүүний багцыг “Сармай дээлт”-гүйгээр төсөөлшгүй. “Сармай дээлт” нь Завханыхны хол ойрын гийчдэдээ өгдөг бэлгийн дээж, тавгийн идээний гол чимэг болж ирсэн түүхтэй гэж Завхан баялаг ХК-аас мэдээлэв.
Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд Улиастайд өнгөрсөн амралтын өдрүүдэд зохион байгуулсан “Хүнсний хангамж, аюулгүй байдал-2024”үйл ажиллагааны үеэр Завхан Баялаг ХК бүтээгдэхүүнийхээ үзэсгэлэнг дэлгэн үзүүлжээ.
Тус компани нь хүнс үйлдвэрлэгч улсын тэргүүний шилдэг 35 үйлдвэрийн нэг юм. Орон нутагтаа хүнсний үйлдвэрлэл, худалдааны үйл ажиллагаа эрхэлдэг бөгөөд 35 нэр төрлийн бүтээгдэхүүн үйлдвэрлэж байна.
Эднийх бүтээгдэхүүнүүдээ орон нутагтаа ургадаг зэрлэг жимс жимсгэнэ, байгалийн давс, цагаан идээгээр үйлдвэрлэдэг. Жилдээ 300 тонн архи, ундаа, жүүс, 150 тонн дарс, ликёр, 300 тонн цэвэр ус, 5 тонн цай, 50 тонн чихэр, 1000 тонн иоджуулсан давс үйлдвэрлэх хүчин чадалтай. Архи, дарс, жимсний чанамал, жүүс, өтгөрүүлсэн жүүсийг 3-4 нэр төрлөөр үйлдвэрлэж байна. Мөн аймгийнхаа Сантмаргац сумын Дэвтээр нуурын давсыг иоджуулж худалдаанд гаргадаг.
Үйлдвэрлэсэн бараа бүтээгдэхүүнээ гадаад, дотоод зах зээлд худалдан борлуулж, өөрийн аймгийнхаа 24 сум, Улаанбаатар хотод гэхэд зургаан худалдааны төвд борлуулалтын цэгтэй. Дархан, Эрдэнэт, Архангай аймаг дахь нэрийн дэлгүүрээрээ дамжуулан бүтээгдэхүүнээ хэрэглэгчдэд нэг үнээр хүргэдэг байна.
Байгалийн гаралтай ургамлын цай, суль, сулхирын цай, баяжуулж савласан суль, сульхир, цэвэр ус, нарийн боов гэх мэт 30 гаруй нэр төрлийн бүтээгдэхүүнийг орон нутагтаа үйлдвэрлэдэг. Тус компанийн бүтээгдэхүүний 80-90 хувь нь Завхан аймагт ирж буй зочид, төлөөлөгчдөд барьдаг бэлэг, брэнд бүтээгдэхүүн болж чаддагаараа онцлогтой.
Эх сурвалж: Монцамэ агентлаг