Завхан аймгийн хүнс үйлдвэрлэгч “Мөнхөд мандаг” ХК бүтээгдэхүүнийхээ нэр төрлийг олшруулж “Тамир” нэртэй өтгөрүүлсэн шүүсийг үйлдвэрлэж худалдаанд гаргажээ.
“Тамир” нэрийн шүүсийг орон нутагтаа ургадаг байгалийн зэрлэг жимсээр үйлдвэрлэж байна. Чацаргана, нэрс, аньс, чонын элэгтэй өтгөрүүлсэн шүүс нь дархлаа дэмжих төдийгүй эмчилгээний зориулалттай.
Ялангуяа өвөл, хаврын улиралд ханиад томуу туссан бол халааж уух, бүлээнээр нь өдөр тутамдаа хэрэглэхэд ч тохиромжтой юм. Хүнс үйлдвэрлэгч үндэсний шилдэг үйлдвэрүүдийн нэг болсон “Завхан баялаг” ХК орон нутагтаа хүнсний үйлдвэрлэл, худалдааны үйл ажиллагаа эрхэлдэг бөгөөд 50 орчим нэр төрлийн бүтээгдэхүүн үйлдвэрлэж байна.
Эдний бүтээгдэхүүнүүд нь байгалийн цэвэр, органик гаралтай. Өөрөөр хэлбэл, хүнд хэрэгтэй амин дэм ихээр агуулдаг зэрлэг жимс нэрс, үхрийн нүд, чацаргана, мөн сүү цагаан идээгээр бүтээгдэхүүнээ хийдэг онцлогтой.
Өөрсдөө сүү цагаан идээгээ боловсруулж ааруул, аарц, тараг, ээзгий зэрэг бүтээгдэхүүнийг үйлдвэрийн аргаар савлаж борлуулдаг. Мөн уламжлалт аргаар шимийн архи нэрж үйлдвэрийн аргаар савлаж борлуулдаг. Үхрийн болон ямааны борцыг үйлдвэрийн аргаар савлаж худалдаалдаг болсон нь иргэдийн эрэлт хэрэгцээг хангаад зогсохгүй жилийн дөрвөн улирал шинэ цагаан идээ хэрэглэх боломжийг орон нутагтаа хангаад буй юм.
Жилдээ архи шүүс 10 тонн, дарс 20 тонн, 7 тонн орчим цайг ээзгийтэй, ургамлын, сульхиртай гэсэн төрлөөр үйлдвэрлэдэг.
Чацарганын тос бага хэмжээгээр үйлдвэрлэж чонын элэг, аньс, нэрс, гишүүнэ, хүрэн манжингийн чанамлыг жилд 30 гаруй тонн үйлдвэрлэж байна. Тус компанийн бүтээгдэхүүнүүд нь Завхан аймагт ирж буй зочид, төлөөлөгчдөд барьдаг бэлэг, брэнд бүтээгдэхүүн болдгооро онцлогтой.
Аймгийнхаа иргэдийн хэрэгцээг хангадаг тус үйлдвэр нэрийн бүтээгдэхүүнээ хөрш зэргэлдээ аймгуудаас гадна нийслэл Улаанбаатар, Эрдэнэт, Дарханы хэрэглэгчдэд Номингийн сүлжээгээр дамжуулан хүргэдэг байна.
“Нутгийн бүтээгдэхүүнээ үйлдвэрийн үнээр нь хэрэглэе” уриатай тус үйлдвэрийн онцлох бүтээгдэхүүн нь чацарганын цэвэр тос, Алтан гагнууртай шимийн охь юм.
Нутгийнхаа хөрсөнд ургасан байгалийн цэвэр хүнс болсон жимс, ус, давсны амт нь хүртэл цаанаа нэг өөр байдаг шүү хэмээн нутгаасаа хол суугаа Завханы уугуул иргэд ам сайтай байдаг.
эх сурвалж: MONTSAME.MN