“Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолыг төр, захиргааны 35 байгууллага хэрэгжүүлэх үүрэгтэй. Уг тогтоолын хэрэгжилтийн хүрээнд Монгол банк, Сангийн яам, Зээлийн батлан даалтын сан, Арилжааны банкнууд үйлдвэрүүдийг татварын бодлогоор дэмжих, санхүүжилтээр дэмжих, төсөл хөтөлбөрүүдийг хэрэгжүүлэх зэргээр хамтран ажиллаж байгаа юм.
Монголбанк
Хүнсний хувьсгалын хүрээнд 23 төсөл хөтөлбөрийг хэрэгжүүлэхээр төлөвлөгдөж, 1.4 их наяд төгрөгийн хөнгөлөлттэй зээл олгохоос одоогоор 1.223 их наяд төгрөгийг 3038 зээлдэгчид арилжааны 10 банкаар дамжуулан олгож, одоогоор 85 хувийн гүйцэтгэлтэй байна.
Нийтдээ 1.3 их наяд төгрөгийн зээл олгогдсоноос бизнесийн өсөлт 10 хувьтай гэсэн судалгааны үр дүн гараад байгаа юм.
Төв банкны зүгээс зээлийг эргэлтийн хөрөнгөөс илүү хөрөнгө оруулалтын зээл болгох тал дээр төлөвлөгөө боловсруулан ажиллаж байна. Цаашид зээлийн зарцуулалт, зээл олгогч арилжааны банкнууд болон зээлдэгчдийн чанах хуваарилалтыг хянах ажлыг хийхээр төлөвлөжээ.
Сангийн яам
2023-2024 онд Сангийн яамнаас газар тариалан, мал аж ахуй, хүнсний үйлдвэрлэлийн чиглэлд нийтдээ 279.2 тэрбум төгрөгийн санхүүжилт олгоод байна. Үүнээс 116.2 тэрбум төгрөгийг газар тариалангийн салбарт олгож, 85.5 тэрбум төгрөгийг мал аж ахуйн салбарт, харин хүнс боловсруулах үйлдвэрт 77.5 тэрбум төгрөгийн санхүүжилт олгожээ. Уг санхүүжилт нь хүүгийн татаас, урамшуулал, улсын төсвийн хөрөнгө оруулалт, гадаад зээл тусламжийн санхүүжилт гэсэн чиглэлүүдээр олгогдоод байгаа юм.
Хүүгийн татаасд нийтдээ 149.2 тэрбум төгрөгийн санхүүжилт олгосноос:
Газар тариалангийн салбарт- 50.8 тэрбум
Мал аж ахуйн салбарт- 17.2 тэрбум
Хүнс үйлдвэрлэлийн салбарт- 81.2 тэрбум төгрөгийг хуваарилан олгожээ.
Зээлийн батлан даалтын сан
Хүнсний хувьсгал хөдөлгөөн хэрэгжиж эхэлснээс хойш хоёр жилийн хугацаанд 33 тэрбум төгрөгийн зээлд 22 тэрбум төгрөгийн батлан даалт гаргаж, зээлүүд хэвийн төлөлттэй байна. Цаашид арилжааны банкаар зээлийн хүсэлт өгсөн хүнс үйлдвэрлэлийн аж ахуй нэгжүүдэд нэг удаадаа хоёр тэрбум хүртэлх зээлийг олгохоор ажиллаж байна. Ингэснээр зөвхөн хүнс, хөдөө аж ахуйн салбарын үйлдвэрлэгчид бус нийт баялаг бүтээгчдэд бүтээгдэхүүн, үйлчилгээгээ таниулах, өргөн хүрээнд үйлчлэх боломжтой юм.
Хаан банк
Нийт хуваарилагдсан санхүүжилтийн 40 хувийг буюу 362.2 тэрбум төгрөгийн зээлийг 1300 гаруй харилцагчид олгоод байна. Тухайн зээлийн үндсэн төлөлт эхлээгүй байгаа учраас зээлдэгчид одоогоор хөнгөлөлттэй хугацаандаа явж байгаа юм.
