Завхан аймаг хүн амынхаа хүнсний ногооны хэрэгцээний 28.7 хувийг дотоодын үйлдвэрлэлээр хангаж байна.
Тус аймгийн газар тариалангийн үйлдвэрлэлийн хэмжээ 1960-1990 он хүртэл жил бүр нэмэгдэж ирсэн бөгөөд 1990 он гэхэд тариалангийн эргэлтийн талбай 82.4 мянган га-д хүрсэн байна.
Өнөөдрийн байдлаар 96 аж ахуйн нэгж, 602 өрх 12.8 мянган га-д газар тариалангийн үйлдвэрлэл эрхэлж байна. Нийт тариалангийн талбайн 15.5 хувийг ашиглаж байна.
Энэ онд үр тариа 835,5 тн, ногоон тэжээл 7236,15 тн, төмс 178,4 тн, хүнсний ногоо 1008,8 тн-ыг хураан авсан нь дотоодын хэрэгцээт төмсний 51 хувь, хүнсний ногооны 28.7 хувийг орон нутгийн үйлдвэрлэлээр хангаж байна.
Ерөнхийлөгчийн санаачлан хэрэгжүүлж буй “Хүнсний хангамж, аюулгүй байдал” үндэсний хөдөлгөөнийг дэмжиж таван жилийн төлөвлөгөө боловсруулан ажиллаж байна. Гол нэрийн 19 төрлийн хүнсний бүтээгдэхүүнээр хэрэгцээгээ дотоодоосоо бүрэн хангаж, мал аж ахуй, газар тариалангаа эрчимжүүлэн хөгжүүлэх зорилтын үр дүн гарчээ.
Тодруулбал энэ онд 335.41 га усалгаатай талбайд төмс, хүнсний ногоо тариалж ургац бүрэн авсан. Услалтын системүүдийг сэргээн засварлаж бүрэн хүчин чадлаар нь ашиглаж чадвал усалгаатай талбай 1522 га-д хүрэх боломжтой юм.
Аймгийн хүн амын төмс, хүнсний ногооны хэрэгцээг 2024-2026 онуудад дотоодын үйлдвэрлэлээр хангахад 861 га усалгаатай тариалангийн талбай шаардлагатай байгаа талаар Завхан аймгийн ХХААГ-аас мэдээлэв.
Эх сурвалж: Монцамэ агентлаг
