Өнгөрсөн оны арванхоёрдугаар сард улс орон даяар мал, тэжээвэр амьтны тооллого болсон. Тэгвэл 2024 оны мал тооллогын жилийн эцсийн урьдчилсан дүн гарч 252.177 толгой мал тоолуулжээ.
Энэ нь 2023 онтой харьцуулахад 9.1 мянган толгой буюу 3.5 хувиар буурсан үзүүлэлттэй байна. Буурсан үзүүлэлтийг тус бүрд нь авч үзвэл, хонь 11.5 хувь буюу 11600 толгой, ямаа 2.3 хувь буюу 1800 толгой буурчээ. Харин тэмээ 29.1 хувь буюу 17 толгой, үхэр 3.7 хувь буюу 1700, адуу 10.7 хувь буюу 2600 толгойгоор өссөн үзүүлэлттэй байна.
Сум тус бүрээр ангилбал Дархан сум 0.3 хувь буюу 43 толгой, Орхон сум 7.6 хувь буюу 3526 толгой, Шарын гол сум 13.8 хувь буюу 2824 толгой, Хонгор сум 1.5 хувь буюу 2716 толгойгоор тус тус цөөрсөн.
Аймгийн хэмжээнд 2024 оны жилийн эцсийн байдлаар 1280 малчин өрх, 829 мал бүхий иргэн тоологдсоноос өмнөх онтой харьцуулахад малчин өрхийн тоо 7.9 хувиар буюу 102 өрхөөр нэмэгдсэн бол мал бүхий өрх, иргэний тоо 9.9 хувь буюу 92 өрхөөр буурсан үзүүлэлттэй байна гэж аймгийн ХХААГ-аас мэдээлэв.
Мал тооллогод 40 чиглэлд 110 тоологч ажиллаж зарим хэсэгт техник, технологид тулгуурлаж дрон ашигласан байна. Ингэснээр мал тооллогыг богино хугацаанд шуурхай зохион байгуулах эхлэлийг тавьсан гэж аймгийн засаг даргын орлогч Б.Жавхлан онцоллоо.
Аймгийн өвс, тэжээлийн аюулгүйн нөөцөд 100 тонн өвс, 50 тонн тэжээл, сумдад 40 тонн өвс, 25 тонн тэжээл бэлтгэжээ. Зудын эрсдэлийн үнэлгээгээр аймгийн нийт нутгаар хамгийн ихдээ 10-15 см цасан бүрхүүл тогтсон, одоогийн байдлаар өвөлжилт хэвийн байна гэв.
Эх сурвалж: Монцамэ агентлаг
