Монгол Улсын Ерөнхийлөгч Ухнаагийн Хүрэлсүх энэ өдрүүдэд Бүгд Найрамдах Турк Улсад төрийн айлчлал хийж байна.
Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Турк Улсад хийж буй төрийн айлчлалын хүрээнд Турк-Монголын бизнес, хөрөнгө оруулалтын уулзалт форумыг Туркийн Танхимууд, биржүүдийн холбоо (TOBB) Монголын Үндэсний Худалдаа Аж Үйлдвэрийн Танхимтай хамтран зохион байгууллаа. Уулзалтад БНТУ-ын Худалдааны сайд Өмер Болат, Монгол Улсын Шадар сайд Л.Гантөмөр, УИХ-ын гишүүн Р.Эрдэнэбүрэн, МҮХАҮТ-ын Ерөнхийлөгч Л.Төр-Од болон Монголын 100 орчим бизнесийн төлөөлөл оролцлоо. Уулзалтын хүрээнд хоёр орны эдийн засгийн хамтын ажиллагааны талаар ярилцаж, цаашид хөрөнгө оруулалтын чиглэлд түлхүү хамтран ажиллана гэдгээ талууд илэрхийлэв.
Форумын үеэр МҮХАҮТ-ын Ерөнхийлөгч Л.Төр-Од хоёр орны бизнес, эдийн засаг, худалдааны талаар илтгэл танилцуулж, хоёр улс хөдөө аж ахуй, аж үйлдвэр, эрчим хүч, уул уурхай, батлан хамгаалах салбараас гадна барилга, аялал жуулчлал зэрэг олон салбарт хамтран ажиллах өргөн боломж байгааг онцоллоо.
Турк, Монголын хоёр талын худалдаа 2024 онд мэдэгдэхүйц өсөж, 115 сая ам.долларт хүрчээ. Энэ нь зөвхөн Туркийн талд ашигтай буюу 112 орчим сая ам.долларын экспорт хийсэн бол Монголоос 3.4 сая ам.долларын экспорт хийжээ. Тиймээс цаашид экспорт, импортыг тэнцвэржүүлэх, хөрөнгө оруулалтыг нэмэгдүүлэх чиглэлээр хамтран ажиллахаа талууд илэрхийлэв.
Туркийн талаас 130 орчим бизнес эрхлэгч, Монголын талаас 100 орчим бизнес эрхлэгч тус форумд оролцсон бөгөөд үргэлжлүүлэн Туркийн бизнес эрхлэгчидтэй хамтран ажиллах харилцаа холбоо тогтоох В2В уулзалт боллоо. Тус уулзалтаар Турк-Монголын бизнес эрхлэгчид 10 орчим хамтран ажиллах гэрээ байгуулж, 15-20 тэрбум төгрөгийн хэлцэл хийгдсэн байна.
Уулзалт, форумын төгсгөлд Турк-Монголын худалдаа аж үйлдвэрийн танхим хоорондын хэлэлцээрт гарын үсэг зурлаа. Ингэснээр хоёр улсын хамтарсан худалдаа аж үйлдвэрийн танхимын үйл ажиллагаа эрчимжиж, бизнес эрхлэгчдийн боломж нэмэгдэх ач холбогдолтой гэв.
