Монгол Улсын Ерөнхийлөгч Ухнаагийн Хүрэлсүх Бүгд Найрамдах Турк Улсын Ерөнхийлөгч Режеп Тайип Эрдоаны урилгаар тус улсад төрийн айлчлал хийж байна.
Монгол Улсын Ерөнхийлөгч Ухнаагийн Хүрэлсүхийн санаачилсан “Хүнсний хувьсгал” “Цагаан Алт” зэрэг үндэсний хөдөлгөөний хүрээнд хүнс, хөдөө аж ахуйн салбарын үйлдвэрлэгч, аж ахуйн нэгжүүдийн төлөөллийг төрийн дээд хэмжээний айлчлалд оролцуулж, гадны сайн туршлага судлах, харилцаа тогтоох, хөрөнгө оруулагч болон хамтрагчаа олоход нь дэмжлэг үзүүлж байна. Тэгвэл энэ удаа Монгол Улсын Ерөнхийлөгчийн Турк Улсад хийж буй төрийн айлчлалд багтсан баялаг бүтээгч, үндэсний үйлдвэрлэгчид Турк Улсын үйлдвэрлэлийг судалж, хамтран ажиллах боломжоо нээж байна.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай нараар ахлуулсан баг өнөөдөр Турк Улсын “Гэрэдэ” аж үйлдвэрийн паркын үйл ажиллагаатай танилцав. Энэ үеэр “Гэрэдэ” арьс ширний парктай Монгол Улсын “Эмээлт эко” аж үйлдвэрийн парк хамтын ажиллагаа эхлүүллээ.
Хоёр улсын аж үйлдвэрийн паркууд дараах чиглэлүүдээр хамтарч ажиллана.
- Арьс ширний аж үйлдвэрийн паркийн удирдлага, менежмент
- Боловсон хүчин, мэргэжилтэн бэлтгэх
- Желатины үйлдвэрлэл нэвтрүүлэх
- Цэвэршүүлэх байгууламж, хог хаягдлын менежмент
Монголоос арьс шир, ноос, ноолууран бүтээгдэхүүний үйлдвэрлэлийг нэмэгдүүлэхэд Бүгд Найрамдах Турк Улстай нягт хамтран ажиллах өргөн боломж байгааг Монголын талын төлөөллүүд онцолж байлаа.
