Дархан-Уул аймгийн хэмжээнд 2024 онд 65.1 мянган тонн ургац хураан авчээ. Энэ нь өмнөх онтой харьцуулахад 6.3 мянган тонн буюу 10.8 хувиар өссөн үзүүлэлттэй байна.
Төмс, хүнсний ногоог намрын улиралд худалдан борлуулахаас гадна өвөл, хаврын хэрэгцээг хангах зорилгоор зориулалтын зоорь, агуулахад нөөцөлдөг. Тухайлбал төмс, хүнсний ногооны 10.8 мянган тонн багтаамжтай 908 бүртгэлтэй агуулах, зоорь байдаг. Үүнээс 16.4 хувь нь механикжсан, хөргүүртэй 1780 тонн багтаамжтай дөрвөн зоорь байна.
Дархан-Уул аймаг нь улсын хэмжээнд зөвхөн төмс, хүнсний ногооны 18.8 хувийг үйлдвэрлэдэг бөгөөд хаврын тариалалт, эрт ургацын хураалт хүртэл тасралтгүй хангахын тулд арван мянган тонн багтаамжтай механикжсан, хөргүүртэй зориулалтын зоорины аж ахуй байгуулах шаардлагатай юм.
Нийт 34236.07 га эргэлтийн талбайтай бөгөөд тариалсан ургацын хэмжээ, газар тариалангийн үйлдвэрлэлээрээ улсын хэмжээнд 24 хувийг эзэлж байна.
Тус бүрээр нь ангилбал улаанбуудай 14.2 мянган тн буюу 3.3 хувь, төмс 5.9 мянган тонн буюу 2.3 хувь, хүнсний ногоо 42.9 мянган тонн буюу 16.5 хувь, тэжээлийн ургамал 991.9 тн буюу 0.4 хувь, тосны ургамал 914.4 тн буюу 1.5 хувийг эзэлж байна.
Эх сурвалж: Монцамэ агентлаг
