Монгол Улсын Ерөнхийлөгч Ухнаагийн Хүрэлсүх Бүгд Найрамдах Турк Улсын Ерөнхийлөгч Режеп Тайип Эрдоаны урилгаар тус улсад төрийн айлчлал хийсэн билээ. Энэхүү айлчлалын хүрээнд Бизнес форум, бизнес тур аялал зохион байгуулагдаж, Туркийн талаас 130 орчим бизнес эрхлэгч, Монголын талаас барилга, хүнс, хөдөө аж ахуй, эрүүл мэнд, уул уурхайн 100 орчим компанийн төлөөлөл оролцсон юм. Бизнес группыг Ерөнхийлөгчийн тамгын газраас Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ахлан ажиллалаа.
Баялаг бүтээгчдийн хамт Турк улсын аж үйлдвэрийн паркын үйл ажиллагаатай танилцаж, туршлага судлахын зэрэгцээ “Гэрэдэ” арьс ширний парк болон Эмээлт эко аж үйлдвэрийн паркын хамтын ажиллагааг эхлүүллээ.
Хамтын ажиллагааны хүрээнд:
- Арьс ширний аж үйлдвэрийн паркийн удирдлага, менежмент
- Боловсон хүчнийг бэлтгэж, үйлдвэрлэлийг өргөжүүлэх
- Желатины үйлдвэрлэл
- Цэвэршүүлэх байгууламж, хог хаягдлын менежмент зэргээр хамтран ажиллана.
Монголоос арьс шир, ноос, ноолууран бүтээгдэхүүн Туркийн зах зээлд бага хэмжээгээр борлуулагддаг байна. Цаашид өлөн гэдэс, торомны ноос, сарлагийн хөөвөр, байгалийн гаралтай эко хүнсний бүтээгдэхүүнүүдийг нийлүүлэх боломжтой юм. Мөн Туркийн Худалдааны сайд халал стандартыг маш сайн хангасан малын гаралтай бүтээгдэхүүнийг экспортлох боломжийн талаар ярилцжээ.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр:
“Үндэсний үйлдвэрлэгчид, бизнес эрхлэгчдийн төлөөлөл БНТУ-ын аж үйлдвэр, техник технологитой танилцлаа. Тухайн үйлдвэрүүд хоорондоо кластераар нэгдэн ажиллаж, маш өндөр бүтээмжтэй, бүрэн технологижсон орчинд аж үйлдвэрлэл явуулж байна. Бид үйлдвэржсэн орон болохын тулд аж үйлдвэрлэл өндөр хөгжсөн бусад улсаас туршлага судлан, эх орондоо нэвтрүүлэх нэн шаардлагатай байна. Энэ удаагийн айлчлалаар БНТУ-тай бүх л салбарт стратегийн түвшинд хамтран ажиллахаар боллоо” гэв.
Форумаар МҮХАҮТ болон БНТУ-ын Гадаад харилцааны байгууллага /DEIK/-тэй харилцан ойлголцлын санамж бичиг шинэчлэн байгуулсан бол манай улсын 10 гаруй компани Туркийн талтай хамтын ажиллагааны хэлэлцээр амжилттай хийлээ. Цаашид харилцааны түвшнийг ахиулан үр дүнтэй хамтран ажиллахаа талууд илэрхийллээ.
