Монгол Улсын Ерөнхийлөгч Ухнаагийн Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд УИХ-аас 36-р тогтоолыг баталсан. Тус тогтоолыг хэрэгжүүлэх арга хэмжээний танилцуулгыг Ерөнхийлөгчийн тамгын газрын Хүнсний төсөл, хөтөлбөр хариуцсан ажлын алба хамтарч ажиллах төрийн байгууллага, хувийн хэвшил, олон улсын байгууллагуудад танилцуулж байна. Энэ хүрээнд Нийслэлийн бодлогын судалгаа шинжилгээний төвийн хамт олонтой уулзлаа.
Уулзалтад Нийслэлийн бодлогын судалгаа шинжилгээний төвийг төлөөлөн:
- Нийслэлийн бодлогын судалгаа шинжилгээний төвийн Гүйцэтгэх захирал Р.Дагва
- Нийслэлийн бодлогын судалгаа шинжилгээний төвийн Зөвлөлүүдийн нарийн бичгийн дарга М.Буяндэлгэр
- Нийслэлийн хүнс хөдөө аж ахуйн газрын дарга Х.Эрдэнэбилэг
“Хүнсний хангамж, аюулгүй байдал” үндэсний хөдөлгөөний ажлын хэсгийг төлөөлөн:
- Ерөнхийлөгчийн үйлдвэр, үйлчилгээний бодлогын зөвлөх Ч.Даваабаяр
- Хүнсний төсөл, хөтөлбөр хариуцсан албаны референт О.Дамдиндулам
- Хүнсний төсөл, хөтөлбөр хариуцсан албаны Гадаад харилцааны мэргэжилтэн Р.Будмаа
- Хүнсний төсөл, хөтөлбөр хариуцсан албаны Хэвлэлийн ажилтан Б.Сэржмядаг нар оролцлоо.
Нийслэлийн бодлогын судалгаа шинжилгээний төв нь Алсын хараа-2050 урт хугацааны бодлогын дэвшүүлсэн зорилтын хүрээнд Улаанбаатар хотын иргэд Дэлхийн нийслэл хотуудын хөгжлийн индекстэй ижил түвшинд таатай амьдрах орчныг бүрдүүлэх шийдлийг боловсруулах зорилготой ажилладаг. Тодруулбал Хүн төвтэй хот, Орчин төвтэй шийдэл, Төлөвлөлт төвтэй хөгжил, Хотын сайн засаглал гэсэн 4 бодлогын зорилтын хүрээнд судалгаа шинжилгээний ажлууд хийж байна. Судалгааны аргачлалын хувьд орон зайн дүн шинжилгээ хийхэд онцгойлон ач холбогдол өгдөг бөгөөд ингэснээр систем динамик загварчлал хийн эдийн засгийн тооцоолол зөв гарах нөхцөл бүрддэг. Зөв дэс дарааллын дагуу хийгдсэн судалгааны эцсийн үр дүн хэрэгжүүлэх бодлогын төсөл арга хэмжээний санал болдог.
Монгол Улсын нийт хүнс, нарийн ногооны хэрэглээний 90 хувь нийслэл хотод байдаг. Энэ утгаараа “Хүнсний хангамж, аюулгүй байдал” үндэсний хөдөлгөөний хэрэгжилтэд тус байгууллага чухал байр суурь эзлэх юм. Тус хөдөлгөөнийг хэрэгжүүлэхэд:
- Хүнсний хангамж
- Хүнсний хүртээмж
- Хүнсний илчлэг, шим тэжээл
- Хүнсний бүтээгдэхүүний аюулгүй байдал гэсэн дөрвөн асуудлыг цогцоор нь шийдвэрлэх шаардлагатай.
Нийслэлийн бодлогын судалгаа шинжилгээний төв нь “Smart urban green city” буюу ухаалаг хүлэмжид суурилсан агро сити байгуулах төслийн судалгааг амжилттай хийгээд байна. Тус төслийн хүрээнд ажлын байр нэмэгдэх, эрчим хүчний бие даасан дагуул хот бий болох, нийтийг хамарсан үйл ажиллагааны салбар болон барилга сууцны салбарын бүтээн байгуулалтууд хийгдэх юм.
Нийслэл хотын хүнсний ногооны хэрэгцээг бүрэн хангахын тулд 391 ширхэг ухаалаг хүлэмж байгуулах шаардлагатай ч тус агро ситигийн хүрээнд эхний ээлжинд 100 ширхэгийг байгуулах нь тохиромжтой гэж үзэж байна. Судалгааны явцад анхны ухаалаг хүлэмжийг Хөдөө аж ахуйн их сургуулийн багш сурагчдын дэмжлэгтэй байгуулж, энэ сарын 20-нд нээлтээ хийхээр төлөвлөж байна.
