Монголын сав, баглаа, боодол үйлдвэрлэгчдийн нэгдсэн холбооны тэргүүн Б.Болдбаатар: Улс орон, ард түмнээ эрүүл хүнсээр хангах ажилд сэтгэлтэй, зүтгэлтэй цаг заваа зориулан оролцохыг уриалъя!
Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд батлагдсан УИХ-ын 36 дугаар тогтоолыг хэрэгжүүлэгч байгууллагуудын 3 дахь удаагийн зөвлөлдөх уулзалтад Монголын сав, баглаа, боодол үйлдвэрлэгчдийн нэгдсэн холбоогоо төлөөлөн миний бие оролцлоо. УИХ-ын 36 дугаар тогтоолын хүрээнд хийгдсэн ажлын үр дүнг сонсоод төрсөн сэтгэгдэл, санал, уриалгыг гаргаж энэхүү бичвэрийг бэлдлээ.
Монгол Улсад “Хүнсний хувьсгал” өрнөөд 1 жил 8 сарын хугацаа өнгөрчээ. Өнгөрсөн хугацаанд Хүнсний хувьсгалынхан бид юуг хийж бүтээв? Юуг орхигдуулав? Юунд анхаарах ёстой вэ?
Аль ч засгийн үед хувийн хэвшлийнхэн бид Төрийн тэргүүний итгэлийг хүлээж, ийм ойрхон ажиллаж байгаагүйг энд тэмдэглэх нь зүйтэй. Тиймээс ч хувийн хэвшлийнхэн тэр дундаа “Хүнсний хувьсгал” ТББ-ын хамт олон бид Төрийн тэргүүний гаргасан санаачлагыг дэмжин салбартаа хийх ажлуудаа төрийн байгууллагуудтай нягт хамтарч ажиллах шаардлагатай байна. Төрийн байгууллагууд ч хувийн хэвшлийнхэн бидний санал санаачлагыг үйл ажиллагаа, бодлого шийдвэртээ тусгаж өгч байж “Хүнсний хувьсгал” үр дүнтэй хэрэгжинэ гэдэгт итгэлтэй байна.
“Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолын хэрэгжилт, явц харьцангүй сайн явж байна. Гэсэн ч орхигдож буй асуудлууд ч байгааг энд бичье.
– Төрийн байгууллагуудын уялдаа холбоог сайжруулах шаардлага байна
– Хувийн хэвшлийнхний хийж хэрэгжүүлж буй ажлын тайланг тайлагнаж буй мэт харагдлаа
– Төрийн байгууллагууд зөвхөн судалгааны байгууллага хэлбэрээр ажиллажээ
Эндээс харахад хэзээ бид олон улсын шаардлагад нийцсэн хүнсний үйлдвэрүүдтэй болох вэ? Хэзээ бид аюулгүй хүнсийг эргэлзэлгүй хэрэглэдэг болох вэ? Хэзээ бид импортын хүнсээ хянаж чаддаг болох вэ? Хэзээ Улаанбаатар хотруу ордог мах, сүү, ногоогоо үйлдвэрийн аргаар боловсруулж, шинжилгээнд хамруулж сурах вэ? Эдгээрийг хэн хариуцах вэ? энэ мэтчилэн олон ойлгомжгүй, хэн хариуцаж хариулах нь мэдэгдэхгүй асуудлууд байсныг орхигдуулж болохгүй.
Энэ бүхний эцэст Монгол Улсын Ерөнхийлөгчийн тамгын газрын дарга Я.Содбаатарын хэлсэн: Энэ ажлыг Ерөнхийлөгч, Ерөнхийлөгчийн тамгын газар хийх үүрэггүй. Төрийн байгууллагууд та бүхний хийх ёстой ажлыг Монгол Улсын Ерөнхийлөгч манлайлал үзүүлж урагшлуулж байгаа гэдэг үг тун чиг үнэн санагдсаныг бичих нь зүйтэй биз ээ!
Энэ удаагийн зөвлөлдөх уулзалтад зөвхөн төрийн байгууллагууд оролцоод зогсохгүй эрдэмтдийн зөвлөлийн гишүүд болон төрийн бус байгууллагуудын төлөөллийн оролцоог хангасан нь туйлын зөв зохион байгуулалт байлаа. Одоо л хувийн хэвшлийнхэн бид ямар үүрэг оролцоотой “Хүнсний хувьсгал”-д оролцохоо тодорхойлж чадаж байна. Тиймээс доорх хэдэн саналыг хүргэе!
– “Хүнсний хувьсгал” хөтөлбөрийн ХЯНАН ШАЛГАХ хороо хэлбэрээр ажиллуулах
– Зөвлөлдөх уулзалт дээр тавигдсан 9 төрийн байгууллагын илтгэл мэдээллээр судалгаа, харьцуулалт хийх
– Судалгааны дараагаар байгууллага бүрт санал, шаардлагыг бичгээр хүргүүлэх
– Өгсөн шаардлагын дагуу ямар ажил хийсэн талаарх мэдээллийг дараагийн Зөвлөлдөх уулзалт дээр сонсох
– “Хүнсний хувьсгал” ТББ-ын удирдах зөвлөлийн гишүүдийн санал, зөвлөмж, шаардлагыг УИХ-ын 36 дугаар тогтоол болон Засгийн газрын 63 дугаар тогтоолтой уялдуулан боловсруулах. Мөн хэрэгжүүлэх байгууллагад нь үүрэгжүүлэх зэрэг ажлыг эхний ээлжинд хийхээр төлөвлөх хэрэгтэй.
Хувийн хэвшлийн хариуцах ажил:
Хөнгөлөлттэй зээлэнд хамрагдаж хийж буй үйлдвэрлэлдээ өсөлт гаргаж, төрийн байгууллагад мэдээлэлээ хүргүүлэх үүрэг хүлээх
Төрийн байгуулагуудын хариуцах ажил:
Хууль, Эрх зүйн орчныг сайжруулах, Лабораторийн чадамжийг дээшлүүлэх, Түгээлтийн системийг бий болгох, Хяналтын систем бий болгох, Стандартуудыг бий болгох, импортыг багасгах, Мэдээллийн систем бий болгох, Урамшууллын системыг зөв явуулах, ард иргэдийг мэдээллээр хангах ажлуудыг төр хариуцах
Монгол Улсын хүнсний хангамж, аюулгүй байдлыг хангах асуудлыг урт хугацаандаа иргэдэд илүү өгөөжтэй байлгахад зөвхөн төрийн байгууллагууд хэрэгжүүлэх бус хувийн хэвшлийнхэн бидний оролцоо чухал юм. Тиймээс улс орон, ард түмнээ, хүнсний салбараа өөд нь татах ажилд идэвхи санаачлагатай цаг, заваа зориулан ажиллахыг уриалж байна.
