Монгол Улсын Ерөнхийлөгч Ухнаагийн Хүрэлсүх “ОБ Пластик” ХХК-ийн сав баглаа боодлын үйлдвэрт ажиллаж, салбарын төлөөллүүдтэй уулзлаа.

Мөн Хүнс, хөдөө аж ахуй, хөнгөн үйлдвэрийн сайд Ж.Энхбаяр, Монгол Улсын Ерөнхийлөгчийн Үйлдвэр, үйлчилгээний бодлогын зөвдөх Ч.Даваабаяр, Эдийн засаг, хөгжлийн яамны Төрийн нарийн бичгийн дарга И.Батхүү, Сангийн яамны Төрийн нарийн бичгийн дарга Ж.Ганбат болон салбарын төлөөллүүд ажиллалаа.

“ОБ Пластик” ХХК нь хүнсний болон үйлдвэрлэлийн зориулалттай сав, баглаа боодлын бүтээгдэхүүн үйлдвэрлэдэг үндэсний хэмжээний томоохон компани юм. Тус үйлдвэр нь орчин үеийн автомат тоног төхөөрөмжөөр тоноглогдсон, түүхий эдийн зарцуулалт багатай, байгальд ээлтэй дахин боловсруулах боломжтой 14 төрлийн бүтээгдэхүүн үйлдвэрлэж байна.

Сав, баглаа боодлын салбарын үндэсний үйлдвэрлэгчид ”Хүнсний хангамж, аюулгүй байдал” үндэсний хөдөлгөөний хүрээнд хөнгөлөлттэй зээлд хамрагдан ажлын байрыг 2500 болгон, бүтээгдэхүүний нэр төрлүүдээ нэмж дотоодын зах зээлийн 50-60 хувийг хангах хүчин чадалтай болжээ.

Монгол Улсад сав баглаа боодлын чиглэлээр нийтдээ 50 гаруй аж ахуйн нэгж байгууллага үйл ажиллагаа явуулж байна. Ингэхдээ жилд 150 орчим тэрбум төгрөгийн бүтээгдэхүүн үйлдвэрлэдэг.

Аж ахуйн нэгжүүд цаасан хайрцгийн 90, гялгар уутны 80, ундаа, усны сав баглааны 87, даацын шуудайны 96, бүх төрлийн шошгын 75 хувийг үйлдвэрлэж байна.

Дотооддоо үйлдвэрлэж буй сав баглаа боодлыг бүтээгдэхүүн

• Гялгар уут, тор
• Цаасан уут, тор
• Даавуун уут, тор
• Ундаа усны хуванцар бэлдэц, бөглөө, бариул
• Хүнд даацын шуудай, төрөл бүрийн шуудай
• Эм, эмийн хэрэгслийн сав баглаа боодол
• Бүх төрлийн шошго

Мөн сав, баглаа боодлын салбарын төлөөллүүд “Хүнсний хувьсгал” хөдөлгөөнийг санаачлан хэрэгжүүлж буй Монгол Улсын Ерөнхийлөгч У.Хүрэлсүх болон тус хөдөлгөөн хэрэгжихэд үндэсний үйлдвэрлэгч, баялаг бүтээгчдийг дэмжин төр хувийн хэвшлийн түншлэлийг эрчимжүүлэн ажиллаж байгаа Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, ХХААХҮЯ-ны хамт олонд талархал илэрхийллээ.

Үндэсний үйлдвэрлэгчид, баялаг бүтээгчид “Хүнсний хувьсгал” хөдөлгөөн хүнс, хөдөө аж ахуйн салбарыг бодитой дэмжиж, үр дүнтэй бодлого болсныг онцлон дараагийн буюу “Хүнсний хувьсгал”-ын хоёр дугаар шатыг эхлүүлснээр дотоодын үйлдвэрүүдийн хүчин чадал 23%, ажлын байр 24%-аар нэмэгдэнэ гэдгийг хэлж байв.