Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд “Түмэн шувуут” ХК-ийн “АГРОФИЙД” тэжээлийн үйлдвэрт ажиллалаа.
Мөн Хүнс, хөдөө аж ахуй, хөнгөн үйлдвэрийн сайд Ж.Энхбаяр, Монгол Улсын Ерөнхийлөгчийн Үйлдвэр, үйлчилгээний бодлогын зөвдөх Ч.Даваабаяр, Эдийн засаг, хөгжлийн яамны Төрийн нарийн бичгийн дарга И.Батхүү, Сангийн яамны Төрийн нарийн бичгийн дарга Ж.Ганбат болон салбарын төлөөллүүд ажиллалаа.
2004 онд байгуулагдсан Аз жаргалыг үйлдвэрлэгч ”Түмэн шувуут” Хувьцаат Компани нь өдгөө дөрвөн салбар үйлдвэртэй, 360 гаруй ажилтан, албан хаагчтай. 17 нэр төрлийн савлагаатай өндөг, 10 нэр төрлийн мал, амьтны тэжээл болон шувууны сангасыг боловсруулж органик бордоо үйлдвэрлэж байна.
“Агро фийд” тэжээлийн үйлдвэр нь 2014 онд ашиглалтад орсон бөгөөд өдөрт 100 тонн тэжээл үйлдвэрлэх хүчин чадалтай. Мөн 3200 га тэжээл тариалах талбайтай бөгөөд бүрэн усалгааны системээр тоноглосноор малын тэжээлийн ургамлын тариалалт нэмэгдэх юм. Тахианы тэжээлээс гадна өөрийн орны онцлогт тохируулсан таван хошуу мал, зэрлэг амьтдын тэжээл үйлдвэрлэж байна.
Тус компанийн “Агрофийд” үйлдвэр тахианы болон мал, амьтны тэжээл үйлдвэрлэж, 21 аймгийн шувууны 25 аж ахуйг тэжээлээр хангаж байна. Энэ онд 40 мянга, ирэх жил 55 мянган тн тэжээл үйлдвэрлэх юм.
Энэ нь “Хүнсний хангамж, аюулгүй байдал” хөдөлгөөний хүрээнд тэжээлийн үйлдвэрийн өргөтгөлийн ажлыг эхлүүлж, хүчин чадлаа нэмэгдүүлсний үр дүн гэдгийг Гүйцэтгэх захирал Ж.Болд онцолж байв.
Компанийн удирдлагууд мөн махны чиглэлийн “Дорпер” хонины үржлийн аж ахуйн төслийнхөө талаар танилцууллаа.
Тус компани нь тэжээлийн гол түүхий эд болох улаанбуудай, хивэг, овъёос, рапсын шахдас, яс махны гурил, шохойн чулуу зэргийг дотоодын газар тариалан эрхлэгчид болон бусад хөдөө аж ахуйн үйлдвэрлэл эрхлэгчдээс худалдан авч түүхий эдийн нөөцөө бүрдүүлдэг байна.
Ингэхдээ тахиа, өндөгний аж ахуй, малын болон тахианы тэжээл, газар тариалан, хонины аж ахуй зэргийг кластераар хөгжүүлж байгаа юм.
