Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд “Түмэн шувуут” ХК-ийн өндөгний үйлдвэрт ажиллалаа.

Мөн Хүнс, хөдөө аж ахуй, хөнгөн үйлдвэрийн сайд Ж.Энхбаяр, Монгол Улсын Ерөнхийлөгчийн Үйлдвэр, үйлчилгээний бодлогын зөвдөх Ч.Даваабаяр, Эдийн засаг, хөгжлийн яамны Төрийн нарийн бичгийн дарга И.Батхүү, Сангийн яамны Төрийн нарийн бичгийн дарга Ж.Ганбат болон салбарын төлөөллүүд ажиллалаа.

2004 онд байгуулагдсан Аз жаргалыг үйлдвэрлэгч ”Түмэн шувуут” Хувьцаат Компани нь өдгөө дөрвөн салбар үйлдвэртэй, 360 гаруй ажилтан, албан хаагчтай. 17 нэр төрлийн савлагаатай өндөг, 10 нэр төрлийн мал, амьтны тэжээл болон шувууны сангасыг боловсруулж органик бордоо үйлдвэрлэж байна.

“Түмэн шувуут” ХК “Хүнсний хангамж, аюулгүй байдал” үндэсний хөдөлгөөний хүрээнд олгосон бага хүүтэй, урт хугацаатай хөнгөлөлттэй зээлд хамрагдан шувууны аж ахуй үйлдвэрлэлийн хүчин чадал, техник технологийн дэвшилд ахиц гарч, үйлдвэрлэл үйл ажиллагаа олон улсын стандартад хүргэж байна.

Энэ онд 170 сая, ирэх жил 250 сая ширхэг өндөг үйлдвэрлэх бөгөөд энэ нь дотоодын зах зээлийн 40 хувь гэсэн үг юм. 2026 онд бүрэн хүчин чадлаараа ажиллаж 50 хувийг хангах юм байна.

“Түмэн шувуут-3” төсөл бүрэн хэрэгжсэнээр 1,2 сая өндөглөгч тахиатайгаар жилд 265 сая ширхэг өндөг борлуулахаар зорьж буй юм.

Мөн “Хүнсний хувьсгал” үндэсний хөдөлгөөн хэрэгжиж эхэлснээс буюу 2023 оноос хойш зах зээлд худалдаалж буй дотоодын өндөгний үнэ нэг ч удаа үнэ нэмэлгүй 500 төгрөгөөр борлуулагдаж байна.

“Хүнсний хувьсгал” хөдөлгөөнд хамрагдсан шувууны аж ахуй эрхлэгчдийн тогтовортой, амжилттай үйл ажиллагаа нь хөдөө аж ахуй, газар тариалангийн салбарт үйл ажиллагаа эрхлэгчдийг давхар дэмжиж буй нэг хэлбэр хэмээн үзэж буйгаа ТУЗ-ийн дарга Л.Эрхэмбаяр онцоллоо.

Ирэх хоёр жилд дотоодын өндөгний аж ахуй нийтдээ 3.0 сая тоо толгой шувуутай болж, жилд дунджаар 650 сая ширхэг өндөг үйлдвэрлэх бөгөөд дотоодын өндөгний хэрэцээг 100 хувь хангаж, нийт 130 манган тонн тэжээл үйлдвэрлэхэд 60 мянган тонн улаанбуудайг дотоодын газар тариалан эрхлэгчдээс худалдан авч хүнсний хангамж, аюулгүй байдлыг хангах зорилгыг бүрэн биелүүлнэ гэдгээ “Түмэн шувуут”-ын хамт олон хэлж байв.

Гол нэр төрлийн 19 бүтээгдэхүүнээр дотоодын хэрэгцээгээ хангах зорилт дэвшүүлсэн “Хүнсний хангамж, аюулгүй байдал” үндэсний хөдөлгөөнийг эхнээс нь тууштай дэмжиж, бодит үр дүн гаргаж байгаа аж ахуйн нэгж, баялаг бүтээгчдэд Монгол Улсын Ерөнхийлөгч У.Хүрэлсүх талархал илэрхийллээ.