Мал аж ахуйн салбар бол дотоодын нийт бүтээгдэхүүний 10.5 хувь, ажиллах хүчний 21.6 хувийг бүрдүүлж байгаа Монгол Улсын нийгэм, эдийн засгийн тогтвортой байдал цаашдын хөгжилд чухал үүрэгтэй салбар. Гэвч дэлхийн дулаарлаас үүдэн сүүлийн 80 жилд агаарын жилийн дундаж температур 2.36 градусаар нэмэгдэж, хур тунадасны хэмжээ 7 хувиар буурч, 3-4 жил тутамд ган, зуд тохиож байгаа нь мал аж ахуйн салбарт томоохон сорилт хүндрэлийг бий болгож байна.

Сүүлийн 70 гаруй жилд манай оронд 13 удаагийн зудын улмаас нийт 45 сая толгой мал зүй бусаар хорогдсон бөгөөд 2010 онд нийт малын 22 хувь нь хорогдож 8.6 мянган малчин өрх малгүй болж байсан. Тэгвэл энэ онд өвөлжилт, хаваржилт хүндэрсний улмаас дөрөвдүгээр сарын 18-ны өдрийн байдлаар улсын хэмжээнд 6.8 сая мал хорогдоод байна. Малынхаа 70 хувийг алдсан 2541 өрх, 80 хувийг алдсан 1180 өрх, 90 хувийг алдсан 586 өрх, огт малгүй болсон 509 өрх байна. Иймд гамшгийн эрсдэл, бодитой бий болсон нөхцөл байдал, гамшигт өртсөн малчдын амьжиргааг дээшлүүлэхэд чиглэсэн арга хэмжээг цаг алдалгүй авах шаардлага тулгараад байна.

ХХААХҮЯ-аас 2024 онд дараах ажлуудыг хийхээр төлөвлөжээ.

• Мал эмнэлгийн дэглэм бүхий эрүүл бүсийн 5 аймгийн 73 сумын үхэр сүргийг ялган тэмдэглэх, мэдээллийн нэгдсэн сан бүрдүүлэх /Мал эмнэлгийн эрүүл мэндийн гэрчилгээ, бүртгэлийн дугаараар гарна/
• Шаардлагатай журам, заавар, бодлогын баримт бичигт өөрчлөлт оруулах, бусад төрийн байгууллагуудтай хамтран ажиллах
• Орон нутгийн мэргэжилтнүүдийг чадавхжуулах чиглэлээр сургалтад хамруулах, чадавхжуулах ажлыг зохион байгуулах
• Эрчимжсэн мал аж ахуй эрхлэгчдийн бүртгэлийн системийг хөгжүүлнэ
• Малыг ялган тэмдэглэх, бүртгэлд хамруулах чиглэлээр мэдээлэл бэлтгэн, олон нийтийн хэрэгслээр түгээх, сурталчлах, таниулах ажлыг зохион байгуулна

2024 онд Мал аж ахуйн салбарт гарах үр дүн:

• Малчин өрхийн малын тоо, толгойн мэдээлэл үнэн зөв болж, мал тэжээвэр амьтны тооллогын ажлыг малын бүртгэлээр дамжуулан зохион байгуулах
• Малын бүртгэлээр дамжуулан малын шилжилт хөдөлгөөнийг хянах, малын гарал үүсэл тодорхой болох, малын эрүүл мэндийг баталгаажуулах, цаашлаад хүнсний аюулгүй байдлыг хангах
• Малын хулгайтай тэмцэх, малын бүртгэлээр дамжуулан алдсан, олдсон малын бүртгэлийг хийх боломжтой болох
• Мал, махны экспорт нэмэгдэх, олон улсын зах зээлд үнэлэгдэх үнэлгээ нэмэгдэх
• Малчин, мал бүхий өрхийн хөрөнгийн үнэлгээ тодорхой болох
• Малын ашиг шимийн бүртгэлийг хөтлөх, хянах тогтолцоо бүрдэх