Хоол боловсруулалт бол эрүүл байхын үндэс юм. Хоол боловсруулалт идэвхтэй ажилласнаар таны бие хоолыг бүрэн боловсруулж, шингээхээс гадна эцсийн бүтээгдэхүүнийг тогтмол гадагшлуулна. Хоол шингэлт муудсанаар биед хортой бодисууд үүсдэг ба эдгээрийг биеэс гадагшлуулахад тийм ч амар байдаггүй юм.
Эслэг хүнсний бүтээгдэхүүн түлхүү идээрэй:
Эслэг хүнсний бүтээгдэхүүн гэдэсний хөдөлгөөнийг хэвийн байлгахад тусалдаг. Ихэнх эслэг ихтэй хоолонд элсэн чихэр, өөх тос, илчлэг бага байдаг тул ерөнхийдөө илүү эрүүл сонголт болно. Овьёос, шош эсвэл жимс нь эслэгийн сайн эх үүсвэр юм. Зарим төрлийн энгийн, цагаан тараг нь пробиотик агуулдаг бөгөөд энэ нь таны гэдсэнд сайн нөлөөтэй бактери юм. Хамгийн түгээмэл нь бифидобактери ба лактобациллус бөгөөд хоол боловсруулах эрхтний зарим асуудлыг сайжруулж, цочромтгой гэдэсний хам шинжийн шинж тэмдгийг бууруулдаг.
Шингэц удаан хүнсний бүтээгдэхүүнээс татгалзах:
Чизбургер, шарсан төмс, пицца зэрэг тослог, өөх тос ихтэй хоол хүнсийг шингээхэд илүү их цаг хугацаа шаардагддаг тул олон цагийн турш гэдэс дүүрэх мэдрэмжийг төрүүлдэг. Энэ төрлийн хоол хүнс нь ходоодны хий, гэдэс базлах, хоол боловсруулах чадварыг бууруулах үйлчилгээтэй. Энэ нь бидний анхаарлаа төвлөрүүлэх чадварт нөлөөлж болзошгүй тул жимс, хүнсний ногоо, өөхгүй махан дээр үндэслэсэн тэнцвэртэй хоол хүнс хэрэглэх нь зүйтэй.
Гэхдээ болгоомжтой байгаарай. Байцаа гэх мэт зарим хүнсний ногоо нь ходоодонд шингэж чадахгүй нарийн төвөгтэй сахар болох рафиноз агуулдаг тул асуудал үүсгэдэг. Шарсан талх нь суулгалтыг зогсоодог цардуул агуулдаг тул хоол боловсруулахад тусалдаг хүнсний бүтээгдэхүүний нэг юм.
Аль болох суугаад хоол идэхийг хичээ:
Явган явж байхдаа хоол идэх нь тэнэг хэрэг, яагаад гэвэл зогсоо байх үед идсэн зүйл хурдан доошилж, гэдэс маань хурдан хоосордог. Хүн сууж хооллоход цусны эргэлт сайжирдаг. Мөн хөлөө завилж идэх үед бидний зүрх судасны даралтыг бууруулж, хоол хүнсийг зөв боловсруулахад тусалдаг.
Ус өтгөн хаталтыг зогсооно:
Ус нь бидний идэж буй хоолыг задлахад тусалдаг бөгөөд ингэснээр бие шаардлагатай тэжээлийг илүү сайн шингээж авдаг. Хэдийгээр хоолны үеэр ус уух нь тийм ч сайн биш гэж хүмүүс ярьдаг ч энэ нь үнэн биш. Ус хоол боловсруулахад тустай төдийгүй хэрэв та өтгөн хатах юм бол их хэмжээгээр уух хэрэгтэй. Хооллох үеэр ус уух нь мөн бага идэхэд нөлөөлдөг.
Тодорхой цагийн хуваарьтай идэх:
Тодорхой цагийн хуваарийн дагуу хооллодог болсноор хоол боловсруулах үйл ажиллагаа хэзээ эхлэх ёстойг бидний бие махбод өөрөө мэддэг болно. Тогтмол бус цагаар хоол хүнс хэрэглэх нь эрүүл мэндэд учрах эрсдэлийг нэмэгдүүлж магадгүй бөгөөд үүнээс гадна жин нэмэх шалтгаан болж болзошгүй. Хэрэв та хэтэрхий завгүй байгаа бол хоолоо түрүүлж бэлдээд, оффис дээрээ тогтсон цагт хооллохыг хичээгээрэй.
Бясалгал хийж стрессээ хянах нь:
Хэрэв бидний бие стресст орсон бол хямарч, хоол боловсруулалт удааширдаг. Үүний үр дүнд гэдэс дүүрэх, гэдэс базлах, хоол боловсруулах чадваргүй болох эсвэл өтгөн хатах зэрэг шинж тэмдэг илэрнэ. Түүнчлэн эсрэгээр нөлөөлж, хоол боловсруулах чадварыг түргэсгэж, суулгах өвчин тусахад хүргэдэг.
Мөн та маш их стресст орсон үед хоолны дуршил нэмэгдэж эсвэл буурч магадгүй юм. Аль аль нь бидний эрүүл мэндэд сайнаар нөлөөлдөггүй тул бясалгах эсвэл хийх зүйлсээ эрэмбэлэхийг хичээ. Супермэн шиг битгий бүгдийг хий, таны эрүүл мэнд юу юунаас илүү чухал юм.
4-7-8 гэсэн амьсгалын дасгал хийх:
Энэ арга бидний хоолны дуршлыг зохицуулж, нойр хулжихаас сэргийлж, стресс бууруулж, хариу үйлдлээ хянах боломжийг олгодог.
Хэлээ дээд үүдэн шүднийхээ ар хэсэгт наагаад огт салгаж болохгүй. Хамраараа дөрвөн секундийн турш гүнзгий амьсгаа авна. Дотроо тоолж хугацааны баримжаа авахыг зөвлөж байна. Ингэж хуримтлуулсан амьсгалаа долоон секунд түгжинэ. Дараа нь амьсгалаа найман секундийн турш гадагшлуулаарай.
Эцэст нь биеэ сайн чагнаж юу болохгүй байгааг анзаарахаа мартуузай. Бие хөших, ходоод өвдөх, гэдэс дүүрэх зэрэг шинж тэмдгүүд хэдэн өдрийн турш үргэлжилж байвал та заавал эмчид хандах хэрэгтэй.