Өөх тос нь бие махбодийн зарцуулах илчлэгийн хэрэгцээг хангах үүрэгтэй үндсэн шимт бодис
юм. Өөх тос нь хүний биеийн эсийн бүрхүүлийн нэн чухал бүрэлдэхүүн хэсэг болдог.
Ялангуяа хүүхдийн тархи, мэдрэлийн эсийн өсөлт хөгжилтөд шийдвэрлэх үүрэгтэй.
Өөх тосны бүтэц
Өөх тос нь тосны хүчил ба глицеринээс тогтоно. Өөх тосны шинж чанар нь түүнд агуулагдах тосны хүчлээс шууд хамаарч байдаг. Тосны хүчлийн бие махбодод үзүүлэх нөлөөгөөр нь орлогдох ба үл орлогдох тосны хүчлүүд гэж ангилдаг. Өөх тосны найрлага дахь тосны хүчлийг химийн шинж чанараар нь ханасан, нэг ханаагүй ба олон ханаагүй тосны хүчил гэж хуваана. Тэдгээрээс шалтгаалан өөх тосыг ханасан, нэг ханаагүй ба олон ханаагүй өөх тос гэж үндсэн 3 бүлэгт хуваана. Мал, амьтны гаралтай өөх тосны найрлагад ханасан тосны хүчил, ургамлын гаралтай тосны найрлагад ханаагүй тосны хүчлийн агууламж давамгайлж байдаг.
Ямар өөх, тосыг сонгон хэрэглэх вэ?
Өөх, тосонд агуулагдах ханаагүй тосны хүчил, ялангуяа нэг ханаагүй тосны хүчлийн агууламжаар түүний эрүүл мэндийн ач холбогдол тодорхойлогддог. Нэг ханаагүй тосны хүчлийн агууламж өндөртэй өөх тос нь хүний эрүүл мэндэд сөрөг нөлөө үзүүлдэггүй.
