Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөн орон даяар хэрэгжиж байна. Энэ хүрээнд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон хүнсний төсөл хөтөлбөр хариуцсан ажлын алба УИХ-аас баталсан 5 бүлэг, 49 заалт, 116 арга хэмжээ бүхий 36-р тогтоолыг хэрэгжүүлэх үйл ажиллагааны танилцуулгыг Хөдөө аж ахуйн их сургуулийн эрдэмтэн багш нарт танилцууллаа.
Тус уулзалтад Хөдөө аж ахуйн их сургуулийг төлөөлөн:
- ХААИС-ийн Инженер технологийн сургуулийн захирал Ж.Мөнгөн
- ХААИС-ийн Агроэкологийн сургуулийн захирал, А.Буянбаатар
- ХААИС-ийн Агроэкологийн сургуулийн тэнхмимийн эрхлэгч Б.Одгэрэл
- ХААИС-ийн Эрдэмтэн нарийн бичгийн дарга Д.Гүрбазар
- ХААИС-ийн Газрын менежментийн тэнхимийн эрхлэгч Д.Хандсүрэн тэргүүтэй 20 орчим багш удирдлагууд оролцсон бол
“Хүнсний хангамж, аюулгүй байдал” үндэсний хөдөлгөөний ажлын хэсгийг төлөөлөн:
- Монгол Улсын Ерөнхийлөгчийн үйлдвэр үйлчилгээний бодлогын зөвлөх Ч.Даваабаяр
- Хүнсний төсөл, хөтөлбөр хариуцсан албаны Ахлах референт Д.Цэвээндорж
- Хүнсний төсөл, хөтөлбөр хариуцсан албаны референт О.Дамдиндулам
- Хүнсний төсөл, хөтөлбөр хариуцсан албаны Гадаад харилцааны мэргэжилтэн Р.Будмаа
- Хүнсний төсөл, хөтөлбөр хариуцсан албаны хэвлэлийн ажилтан Б.Урантуяа нар оролцлоо.
Хөдөө аж ахуйн их сургууль нь “Хүнсний хангамж, аюулгүй байдал” үндэсний хөдөлгөөний хүрээнд хэд хэдэн чиглэлээр үүрэг хүлээж ажиллах юм. Тухайлбал хүнс үйлдвэрлэл, шинэ сорт нутагшуулах, техник технологи, механикжуулалт бий болгох, чадварлаг хүний нөөц бүрдүүлэхэд хамтран ажиллана. Ялангуяа сүүлийн жилүүдэд Хөдөө аж ахуйн их сургуульд элсэх оюутнуудын тоо эрс цөөрсөн. Нийгэм, цаг үе залууст нөлөөлж, “хотын” гэх тодотголтой мэргэжлүүд эзэмшихийг илүү хүсдэг болсон. Тиймээс чадварлаг хойч үеэ бэлдэхэд төр дэмжлэг үзүүлж, энэ салбарын оюутнуудад тэтгэлэг өгөх, сургалтын төлбөрөөс чөлөөлөх хэрэгтэй байгааг хэллээ.
Мөн малын тэжээл бэлтгэх явцад анхаарал хандуулах шаардлагатай байна. 1996 оноос эхлэн аж ахуйн нэгж, хоршоод малын тэжээлээр дагнасан тэжээлийн үйлдвэрлэлийг эрхэлж эхэлсэн ба 2011 оноос эхлэн тэжээлийн үйлдвэрлэл эрчимтэйгээр нэмэгдэж аж ахуйн нэгжийн тоо 1996 оныхтой харьцуулвал 5 дахин нэмэгдсэн. Тэжээлийн үйлдвэрүүд түүхий эдийнхээ 80 орчим хувийг дотоодоос, 20 хувийг импортоор хангадаг. Үүнээс аж ахуйн нэгжийн 70 орчим хувь нь өөрсдөө түүхий эдээ тариалдаг бол үлдсэн 30% нь дотоодоос, зарим нь импортоор түүхий эдээ худалдаж авдаг гэх албан мэдээлэл бий. Эдгээр үйлдвэрүүд пивоны шаарыг малын тэжээлд ашиглаж байгаа нь сүү, сүүн бүтээгдэхүүний чанарт сөрөг нөлөө үзүүлж байгааг ХААИС-ийн эрдэмтэн судлаачид шүүмжилж байв.
