Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөн орон даяар хэрэгжиж байна. Энэ хүрээнд УИХ-аас баталсан 5 бүлэг, 49 заалт, 116 арга хэмжээ бүхий 36-р тогтоолыг хэрэгжүүлэх үйл ажиллагааны танилцуулгыг Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон хүнсний төсөл хөтөлбөр хариуцсан ажлын алба Хөдөө аж ахуйг дэмжих санд танилцууллаа.

Тус уулзалтад Хөдөө аж ахуйг дэмжих санг төлөөлөн:

• Хөдөө аж ахуйг дэмжих сангийн Гүйцэтгэх захирал О.Сумъяасүрэн
• Хөдөө аж ахуйг дэмжих сангийн Захиргаа үйлчилгээний дарга Б.Батбаяр
• Хөдөө аж ахуйг дэмжих сангийн Санхүү бүртгэл, хөрөнгө оруулалтын газрын дарга Б.Сэргэлэн
• Хөдөө аж ахуйг дэмжих сангийн Газар тариалангийн хэлтсийн дарга Ч.Чинзориг
• Хөдөө аж ахуйг дэмжих сангийн Захиргаа үйлчилгээний мэргэжилтэн Д.Энхбаяр

“Хүнсний хангамж, аюулгүй байдал” үндэсний хөдөлгөөний ажлын хэсгийг төлөөлөн:

• Монгол Улсын Ерөнхийлөгчийн үйлдвэр үйлчилгээний бодлогын зөвлөх Ч.Даваабаяр
• Хүнсний төсөл, хөтөлбөр хариуцсан албаны Ахлах референт Д.Цэвээндорж
• Хүнсний төсөл, хөтөлбөр хариуцсан албаны референт О.Дамдиндулам
• Хүнсний төсөл, хөтөлбөр хариуцсан албаны Гадаад харилцааны мэргэжилтэн Р.Будмаа
• Хүнсний төсөл, хөтөлбөр хариуцсан албаны хэвлэлийн ажилтан Б.Урантуяа нар оролцлоо.

Хөдөө аж ахуйг дэмжих сан нь Монгол Улсын Засгийн газрын 2021 оны 01 дүгээр сарын 08-ны өдрийн 16 дугаар тогтоолоор Тариалан эрхлэлтийг дэмжих сан, Мал хамгаалах санг нэгтгэн “Хөдөө аж ахуйг дэмжих сан” нэртэйгээр үйл ажиллагаагаа шинэчлэн ажиллаж байгаа бөгөөд 5 төрлийн дэмжлэг үзүүлэх чиглэлээр 7 үндсэн салбартай үйл ажиллагаа явуулж байна.

Тус сангийн зорилго нь хүнс хөдөө аж ахуйн салбарын бодлогын удирдамж, үндсэн чиглэл, хөтөлбөр, төслийг хэрэгжүүлэхэд шаардагдах санхүүгийн нөөцийг бүрдүүлж, зөв зохион байгуулалттайгаар хуваарилах замаар хөдөө аж ахуйн үйлдвэрлэлийн эдийн засгийн үр ашгийг дээшлүүлэхэд дэмжлэг үзүүлэхэд оршино. Өнөөдрийн байдлаар байнгын идэвхтэй 1000 гаруй, давхардсан тоогоор 34 мянган аж ахуйн нэгжүүд Хөдөө аж ахуйг дэмжих сантай харьцаж байна. Иймд “Хүнсний хангамж, аюулгүй байдал” үндэсний хөдөлгөөнийг хэрэгжүүлэхэд тус сангийн дэмжлэг оролцоо чухал.

Хөдөө аж ахуйг дэмжих сан дараах үйлчилгээг иргэн, аж ахуйн нэгжүүдэд үзүүлдэг. Үүнд:

1. Тариалан эрхлэгч иргэн, аж ахуйн нэгжүүдэд санхүүгийн дэмжлэг үзүүлэх үүднээс шатахуун, ургамал хамгааллын бодис, бордоо, үрийн буудай зэргийг 0-30 хувийн урьдчилгаа төлбөртэйгөөр
2. Усалгааны тариаланг хөгжүүлэх, услалтын систем байгуулах, техник технологийн шинэчлэлтийг дэмжих зорилгоор ОХУ, БНХАУ, БНБАУ-с үр тарианы комбайн, трактор, үрлэг, сийрүүлэгч, сэндлэгч, иш өргөгч, үр ариутгагч, хор цацагч ангилангийн жатка, 100-500 тоннын багтаамж бүхий ган силосууд зэргийг тодорхой нөхцөлтэйгөөр хөнгөлөлттэй зээлээр
3. Төмс, хүнсний ногоо, жимсний аж ахуй эрхлэгчдэд 1-3 га-гын услалтын систем, хүлэмж, жимсний суулгац, хөргүүр, бага оврын хадлангийн трактор, төмс, хүнсний ногооны трактор, мотоблок зэргийг мөн тодорхой нөхцөлтэйгөөр хөнгөлөлттэй зээлээр олгодог

“Хүнсний хувьсгал”-ыг орон даяар амжилттай хэрэгжүүлэх явцад иргэд, аж ахуйн нэгжүүдэд олон төрлийн дэмжлэг үзүүлэхээр төлөвлөгдсөн. Үүнд зөв бодлого чухал. Хүлэмж олгосон 5 айлын 2 нь л тогтвортой үйл ажиллагаагаа явуулдаг. Тиймээс тавууланг нь үр дүнтэй ашиглах зөв бодлогыг хэрэгжүүлэх шаардлагатай гэдгийг 36-р тогтоолыг хэрэгжүүлэх арга хэмжээг танилцуулах үеэр Хөдөө аж ахуйг дэмжих сангийн Гүйцэтгэх захирал О.Сумъяасүрэн хэлж байв.