Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд УИХ-аас “Хүнсний хангамж, аюулгүй байдлын талаар авах зарим арга хэмжээний тухай” 36-р тогтоолыг баталсан. 5 хэсэг, 49 заалт бүхий уг тогтоолыг хэрэгжүүлэх арга хэмжээний төлөвлөгөөнд тусгасан 114 ажил, арга хэмжээ ирэх таван жилийн хугацаанд орон даяар хэрэгжих юм. Хүнсний салбарт хэрэгжих дээрх ажлуудыг төрийн 24 байгууллага хамтран хэрэгжүүлэхээр тусгасны нэг нь Засгийн газрын хэрэгжүүлэгч агентлаг Газар зохион байгуулалт, геодези, зураг зүйн газар юм.
Энэ хүрээнд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон ЕТГ-ын Хүнсний төсөл, хөтөлбөр хариуцсан алба Газар зохион байгуулалт, геодези, зураг зүйн газрын дарга А.Энхманлай болон тус газрын алба хэлтсийн дарга нарт “Хүнсний хангамж, аюулгүй байдлын талаар авах зарим арга хэмжээний тухай” УИХ-ын 36-р тогтоолыг хэрэгжүүлэх ажлын төлөвлөгөөг танилцууллаа.
Тус уулзалтад Газар зохион байгуулалт, геодези, зураг зүйн газрыг төлөөлөн:
- Газар зохион байгуулалт, геодези, зураг зүйн газрын дарга А.Энхманлай
- Газар зохион байгуулалт, геодези, зураг зүйн газрын Захиргаа, Удирдлага хамтын ажиллагааны хэлтсийн дарга Р.Ганхуяг
- Газар зохион байгуулалт, геодези, зураг зүйн газрын Газар зохион байгуулалтын хэлтсийн дарга Ц.Ихбаяр
- Газар зохион байгуулалт, геодези, зураг зүйн газрын Суурь судалгаа, мониторингийн хэлтсийн дарга Б.Энхгэрэл
- Газар зохион байгуулалт, геодези, зураг зүйн газрын Хамтын ажиллагаа хариуцсан мэргэжилтэн Г.Баянжаргал
“Хүнсний хангамж, аюулгүй байдал” үндэсний хөдөлгөөний ажлын хэсгийг төлөөлөн:
- Монгол Улсын Ерөнхийлөгчийн үйлдвэр үйлчилгээний бодлогын зөвлөх Ч.Даваабаяр
- Хүнсний төсөл, хөтөлбөр хариуцсан албаны Ахлах референт Д.Цэвээндорж
- Хүнсний төсөл, хөтөлбөр хариуцсан албаны референт О.Дамдиндулам
- Хүнсний төсөл, хөтөлбөр хариуцсан албаны Хэвлэлийн ажилтан Б.Хулан нар оролцлоо.
Уулзалтаар ЕТГ-ын Хүнсний төсөл, хөтөлбөрийн албаны ахлах референт Д.Цэвээндорж “Хүнсний хангамж, аюулгүй байдал” үндэсний хөдөлгөөний хүрээнд иргэд, олон нийт, хамтран хэрэгжүүлэгч байгууллагуудыг мэдээ, мэдээллээр хангах Hunsniihuvisgal.mn сайтын танилцуулгыг хийлээ. Мөн Хүнсний төсөл, хөтөлбөрийн албаны референт О.Дамдиндулам “Хүнсний хангамж, аюулгүй байдлыг хангах талаар авах зарим арга хэмжээний тухай” Монгол Улсын Их хурлын тогтоолыг хэрэгжүүлэх арга хэмжээний төлөвлөгөөнд тусгасан Газар зохион байгуулалт, геодези, зураг зүйн газрын хамтран хэрэгжүүлэх ажлыг дэлгэрэнгүй танилцууллаа
Уулзалтын үеэр Монгол Улсын Газар зохион байгуулалтын ерөнхий төлөвлөгөөг Газар зохион байгуулалтын хэлтсийн дарга Ц.Ихбаяр танилцуулав. Уг төлөвлөгөөнд Хөдөө аж ахуйн чиглэлээр төлөвлөгдсөн газар болон ашиглалтын талаар сонирхолтой тоон мэдээлэл, судалгааг тусгасан байв. Тухайлбал манай улсын хувьд 9.4 сая га газрыг хөдөө аж ахуйн чиглэлээр ашиглах боломжтой гэж газар зохион байгуулалтын ерөнхий төлөвлөгөөнд тусгажээ.
УИХ-ын 36-р тогтоолд Газар тариалангийн чиглэлээр хийж хэрэгжүүлэх ажилд тариалангийн зориулалттай газар ашиглалтыг сайжруулах, талбайн хэмжээг нэмэгдүүлэх зорилгоор шинээр 200.0 мянган гектар хүртэл атар газрыг тариалангийн газарт шилжүүлэх, эргэлтийн талбайг 1.1 сая гектарт хүргэх, усалгаатай тариалангийн талбайг 5.0 мянган гектараар нэмэгдүүлэх, тариалангийн газрыг улсын газар зохион байгуулалтын төлөвлөгөөтэй уялдуулах ажлыг тусгасан. Энэхүү ажил нь манай улсын газар зохион байгуулалтын ерөнхий төлөвлөгөөтэй уялдах бөгөөд энэхүү ажлыг Газар зохион байгуулалт, геодези, зураг зүйн газраас удирдан зохион байгуулж, хамтран хэрэгжүүлэх юм.
