’’Хүнсний хангамж аюулгүй байдал’’ үндэсний хөдөлгөөний орон нутаг дахь нээлтийн ажиллагааг хэрэгжүүлэн ажиллаж буй баг бүрэлдэхүүн Сэлэнгэ аймагт ажилласныхаа дараа Алтанбулаг сумын нутагт байрлах “Тужийн нарс”-нд хүрэлцэн ирж 2003 оны ойжуулалт, нөхөн сэргээлтийн талбайтай танилцлаа.

Ерөнхийлөгчийн санаачлан хэрэгжүүлж буй “Тэрбум мод” үндэсний хөдөлгөөнийг дэмжиж Сэлэнгэ аймаг үндэсний хэмжээнд тарьц, суулгац нийлүүлэгч аймаг болох том зорилт дэвшүүлж хөдөлмөрлөж байгаа явдалд талархалаа илэрхийлж “Тужийн нарсны тусгай хамгаалалттай байгалийн цогцолборт газар”-ын талбайд өөрсдийн хувь нэмрээ оруулж, мод тарьлаа.

Тужийн нарсны тусгай хамгаалалттай газарт хүний гараар бүтсэн бүхэл бүтэн нарсан ой бий болж байгаль экологийг сэргээж болдгийн гайхамшигт жишээ болж чаджээ.

1986-2002 онуудад Тужийн нарсанд долоон удаагийн их хэмжээний түймэр гарахын зэрэгцээ иргэдийн эмх замбараагүй ашиглалтын нөлөөгөөр 70 орчим хувь нь устсан гашуун түүхтэй. 2001 оноос эхлэн Улсын болон орон нутгийн хөрөнгө оруулалтыг Тужийн нарсыг нөхөн сэргээх үйл ажиллагаанд төвлөрүүлж ажилласнаар 10088,65 га ой нөхөн сэргээд байна. 2003 оноос БНСУ-ын “Юүхан Кимберли” компани, Зүүн Хойд Азийн Ойн форум хамтран ойг нөхөн сэргээх ажлыг эхлүүлж 3250 га талбайг нөхөн сэргээсэн нь нийт талбайн 32,3 хувийг эзэлж байгаа юм.

Мөн энд 10 метр өндөр, зургаан метр урт, таван метрийн өргөнтэй нийт 144м2 талбайтай ойг бүхэлд нь харж ажиглах өндөр цамхаг ч бий болжээ. Цамхаг дээр аялж зугаалж яваа иргэд олноор ирдэг бөгөөд Буур хээрийн тал Оргидог булагаар урагшаа салж гол гараад Баянбулагийн эх гэдэг газар цамхаг байрладаг юм байна.