Өмнөговь аймаг Монгол Улсын Ерөнхийлөгчийн санаачилгаар хэрэгжиж байгаа “Хүнсний хувьсгал” үндэсний хөдөлгөөн, ХХААХҮЯ-наас хэрэгжиж байгаа бодлого чиглэлтэй төлөвлөгөөт ажлаа уялдуулж, газар тариалан мал аж ахуйн салбараа дэмжих “Нутгийн жишиг” хөтөлбөрийг амжилттай хэрэгжүүлж байна. Тодруулбал, Аймгийн удирдлагуудын зүгээс 2023 онд газар тариалан эрхлэгч иргэддээ 400 хүлэмж олгох шийдвэр гаргасан бөгөөд одоогийн байдлаар 100 хүлэмж олгогдож, удахгүй 300 хүлэмж дахин олгох гэж байна.
Аймгийн Засаг даргын орлогч Ц.Дэнээдорж, ХХААГ-ын дарга Ш.Бат-Эрдэнэ нар хүлэмжийн аж ахуй эрхлэгч нарынхаа хүлэмжээ хэрхэн ашиглаж, үр шимийг хүртэж байгаатай нь танилцах, үр дүнг тооцох ажлыг явуулж байна.
Нутгийн хишгээр олгогдож байгаа хөнгөлөлттэй хүлэмж авсан гэр бүл Ш.Жамцдорж, Ю.Алгирмаа нар аймгийн төвөөс зүүн хойно Хаяа гол хэмээх газар ногоо тариалж, хөнгөлөлттэй хүлэмж авч газар тариалангаа хөгжүүлж байна.
Тус гэр бүл 1998 оноос эхлэн Ханхонгор сумын Жаргалант багт ногоо тарьж эхэлсэн бөгөөд сүүлийн жилүүдэд Хаяагийн голд мод үржүүлэх чиглэлээр газар авснаар 400 гаруй мод тарьж, мөн тодорхой газарт хүнсний ногоо тариалж байна. Энэ жилээс хөнгөлөлттэй үнээр хүлэмж авснаар дан тарвас тарихад хүлэмжээ ашигласан байна. “Хүлэмжтэй болсноор орлого нэмэгдэж, тариалалтын нэр төрөл олширсон” хэмээн тариаланч Ю.Алгирмаа хэллээ.
